ޝަހީދުވި ފަރާތްތަކުގެ އާއިލާތަކަށް ހާއްސަކޮށް 50 ހައުސިން ޔުނިޓު އިމާރާތް ކުރުމަށް ނިންމަވާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައި ވިދާޅުވީ، ނަސްރުގެ ދުވަހުގެ މުނާސަބަތުގައި ރޭ ދަރުބާރުގޭގައި ބޭއްވި ރަސްމީ ޖަލްސާގައި ގައުމާ މުހާތަބު ކުރައްވާ ވާހަކަފުޅު ދައްކަވަމުންނެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވަނީ ޝަހީދުން ކުރެއްވި މަތިވެރި ޖިހާދު އޭގެ ފުރިހަމަ ގޮތުގައި އަގުވަޒަން ކުރަން ޖެހޭކަން ފާހަގަކުރައްވައި، އެބޭކަލުންނާއި އެބޭކަލުންގެ ޢާއިލާތަކަށް ޚާއްޞަ ކުރައްވައިގެން ބޯހިޔާވަހިކަމުގެ މި މަސައްކަތް އެމަނިކުފާނުގެ ދައުރު ނިމުމުގެ ކުރިން ކުރައްވައި، 50 ހައުސިން ޔުނިޓް މި ދައުރުގެ ތެރޭގައި އަޅާ ނިންމަވައި އެ ޢާއިލާތަކާ ޙަވާލު ކުރައްވާނޭ ކަމުގެ އުފާވެރި ހަބަރު ދެއްވާފައެވެ. އަދި ޝަހީދުންގެ ޢާއިލާތަކަށް ސަރުކާރުން ދެމުން އައި ފައިސާ ދިނުން ހުއްޓިފައިވާކަން ފާހަގަކުރައްވައި، އެ ފައިސާ ދެއްވުން އަލުން ފަށްޓަވަން ނިންމަވާފައިވާ ކަމުގައި ވެސް އެމަނިކުފާނު ވިދާޅުވިއެވެ.
ނަޞްރުގެ ދުވަހުގެ މުނާސަބަތުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑޮކްޓަރ މުޢިއްޒު ވަނީ ދިވެހި ޢަސްކަރިއްޔާ ހަރުދަނާ ކުރެއްވުމަށް ގިނަ މުހިންމު މަސައްކަތްތަކެއް ކުރައްވަމުން ގެންދަވާ ކަމުގައި ފާހަގަކުރައްވާފައެވެ.
އެގޮތުން ދިވެހި ރާއްޖޭގެ އުތުރާއި ދެކުނުގައި ތަރައްޤީ ކުރާ ޢަސްކަރީ މަރުކަޒުތަކުގެ މަސައްކަތްތަކާއި، އަދި ކުރިއަށް ކުރައްވަން ނިންމަވާފައިވާ ކަންކަމަށް އަލިއަޅުއްވާލައްވަމުން ވިދާޅުވީ، ޢަސްކަރީ ރޮނގުން މީހުން ބިނާ ކުރުމުގެ ދާއިރާގެ ތެރެއިން ޤާނޫނުން ބާރު ލިބިގެން ޤައުމީ ޚިދުމަތުގެ ޕްރޮގްރާމް ފެށްޓެވުމަށް ނިންމަވައި ޢުމުރުން 16 އަހަރުގައި ދިވެހި ސިފައިންގެ ޚިދުމަތަށާއި ދިވެހި ފުލުހުންގެ ޚިދުމަތަށް ޝައުޤުވެރިވާ ކުދީންނަށް އެފުރުޞަތު ހޯއްދަވައިދެއްވާ އެކަމަށް ނިކުންނަ ފަރާތްތަކަށް އެރޮނގުން މަތީ ތަޢުލީމް ޙާޞިލް ކުރުމުގެ ފުރުޞަތު ފަހިވާ ގޮތަށް ޤާނޫނުތަކަށާއި ޤަވާޢިދުތަކަށް ބަދަލުތައް ގެންނެވުމަށް މަސައްކަތް ކުރައްވާނޭ ކަމުގައި ވިދާޅުވެއެވެ.
