ބޭރު ގައުމުތަކުގައި ކިޔަވާ ދިވެހި ދަރިވަރުންގެ ތެރެއިން 1،200 ޑޮލަރަށް ޑޮލަރު ލިމިޓު ބޮޑުކުރަން ބޭނުންވާ ދަރިވަރުންނަށް ބީއެމްއެލުން ޕޯޓަލެއް ހަމަޖައްސައިފިއެވެ.
ބީއެމްއެލުން ބުނީ، ޑޮލަރު ލިމިޓް ބޮޑުކުރުމަށްޓަކައި ޕާސްޕޯޓުގެ ކޮޕީއަކާއި ދަރިވަރުގެ ވިސާ އާއި ޔުނިވާސިޓީގައި އެ ދަރިވަރު ކިޔަވަމުންދާ ކަމުގެ ލިޔުމެއް ބޭނުންވާނެ ކަމަށެވެ. އަދި އެ ލިޔުމުގައި ދަރިވަރުގެ މައުލޫމާތުގެ އިތުރުން ދަރިވަރު ކިޔަވާ ކޯހުގެ މައުލޫމާތު އޮންނަން ޖެހޭނެ ކަމަށް ބީއެމްއެލް އިން ވަނީ ބުނެފައެވެ.
ބީއެމްއެލް އިން ވަނީ ޕޯޓަލްގައި ރަޖިސްޓްރީވެ ޑޮލަރު ލިމިޓު ބޮޑުކުރުމަށް ދަރިވަރުން ހުށަހެޅުމުން، އެއް ދުވަހުގެ ތެރޭ ޑޮލަރު ލިމިޓު ބޮޑުކޮށްދޭނެ ކަމުގައެވެ. އަދި އޭގެ ފަހުން ބީއެމްއެލްގެ މޯބައިލް އެޕްލިކޭޝަނަށް ނޮޓިފިކޭޝަން ލިބޭނެ ކަމަށް ވެސް ބޭންކުންވަނީ ބުނެފައެވެ.
މި ލިމިޓުގެ ތެރެއިން، އެހެން ގައުމުތަކުގައި ބޭނުންކުރުމަށް 250 ޑޮލަރުގެ ލިމިޓެއް ލިބޭނެ ކަމަށް ވެސް ބީއެމްއެލް އިން ވަނީ ބުނެފައެވެ. ބީއެމްއެލުން ބުނީ، ޑޮލަރު ލިބުމުގައި ދަތިކަމެއް ހުރި ނަމަވެސް ދަރިވަރުންގެ ލިމިޓު ބޮޑުކުރަން ނިންމީ، ދަރިވަރުންގެ މާލީ ބޭނުންތަކަށް އިސްކަންދީ އެކަމަށް ރިއާޔަތްކުރުމަށް ފަހު ކަމަށެވެ.
