ރާއްޖެއަށް ސިއްރުން އެތެރެކުރަން އުޅުނު ގިނަ އަދަދެއްގެ ސިނގިރޭޓް ކަސްޓަމްސްއިން އަތުލައިގެންފިއެވެ.
ހޯކްސް ޕްރައިވެޓް ލިމިޓެޑްގެ އެޖެންޓްކަމުގެ ދަށުން 2024 އޮކްޓޯބަރ 24 ވަނަ ދުވަހު ރާއްޖެ އައި “އެމް.ޓީ ހޯކްސް ޖަވާހިރު” ނަމަކަށް ކިޔާ ބޯޓަކުން ގިނަ އަދަދެއްގެ ސިނގިރޭޓް އެތެރެކުރަން އުޅޭކަމުގެ މައުލޫމާތު, 2024 އޮކްޓޯބަރ 25 ވަނަ ދުވަހުގެ ރޭ ކަސްޓަމްސް އަށް ލިބުމާގުޅިގެން, ހިންގުނު ޚާއްސަ އޮޕަރޭޝަނެއްގައި އެތަކެތި މިހާރު ވަނީ ކަސްޓަމްސްގެ ބެލުމުގެ ދަށަށް ގެނެވިފައެވެ.
ކަސްޓަމްސް އިން ބުނީ މި ބޯޓުން ހޯކްސް ޕްރައިވެޓް ލިމިޓެޑްގެ ލޯކަލް ދޯންޏެއްކަމަށްވާ “ހޯކްސް ރޯދި” އަށް އަރުވައިގެން ކ.ތިލަފުއްޓަށް ގެނެސް, އެކުންފުނީގެ ނަމުގައި ރަޖިސްޓަރީކޮށްފައިވާ ޓްރަކަކަށް އެތަކެތި އަރުވައިގެން ގެންގޮސް، ބޭލުމުގެ މަސައްކަތް ކޮށްފައިވަނީ ކ. ތިލަފުށީގައި ހުންނަ އެ ކުންފުނީގެ ބޯޓު ޔާޑަކަށް ކަމަށެވެ. އެތަކެތި ބޭލުމަށް މަސައްކަތްކޮށްފައިވަނީ 2024 އޮކްޓޯބަރ 25 ވަނަ ދުވަހުގެރޭ ގާތްގަނޑަކަށް 10:00 އެހާކަށް ހާއިރުކަމަށް ކަސްޓަމްސް އިން ވަނީ ބުނެފައެވެ. އަދި އެތަކެތި ބޭލުމަށް މަސައްކަތްކުރި ބޯޓު ޔާޑުގައި އިތުރު ސިނގިރޭޓް ހުރިކަމަށް ޝައްކުކުރެވޭތީ, ކޯޓު އަމުރެއްގެ ދަށުން މިހާރު ދަނީ އެތަން ބަލައިފާސްކުރަމުން އަންނަކަމަށް ކަސްޓަމްސް އިން ވަނީ ބުނެފައެވެ. .
މިހާތަނަށް “ހޯކްސް ބޯޓްޔާޑު” ބަލާފާސްކުރި ކުރުމުން، އެތަނުގައި ހުރި އެކޮމަޑޭޝަނުންނާއި ވޯކްޝޮޕުން މެންޗެސްޓަރ ބްރޭންޑުގެ ސިނގިރޭޓު (ގާތްގަނޑަކަށް 1.695 މިލިއަން ސިނގިރޭޓް ސްޓިކްސް) ވަނީ ފެނިފައެވެ. މިސިނގިރޭޓްތައް މިހާރު ވަނީ ކަސްޓަމްސްގެ ބެލުމުގެ ދަށަށް ގެނެވިފައެވެ. މިއީ ރާއްޖެއަށް ސިއްރުން މުދާ އެތެރެކުރަން އުޅުނުކަމަށް ތުހުމަތުކުރެވޭ މައްސަލައެއްއަކަމަށްވާތީ، މި މައްސަލައިގެ ތަހުޤީޤް ކަސްޓަމްސްއިން ފަށާފައިވާކަމަށް ވަނީ ބުނެފައެވެ. ރާއްޖެއަށް އެތެރެކުރެވޭ މުދަލުގެ ލިޔެކިއުން ނިންމުމާއި މުދާ ބަލައިފާސްކުރުމުގެ މަރުޙަލާތަކުގައި ކަސްޓަމްސްއަށް ލިބޭ އިންޓެލިޖެންސް މަޢުލޫމާތާއި ކަސްޓަމްސްގެ ހިރާސް ނިޒާމުގެ ތެރެއިން ކަނޑައެޅޭ ގޮތެއްގެމަތީން އަމަލުކުރާނެ ކަމަށް ކަސްޓަމްސް ވަނީ ބުނެފައެވެ. އަދި ރާއްޖެއަށް އެތެރެކުރެވޭ މުދަލާގުޅޭގޮތުން ކަސްޓަމްސްގެ ޤާނޫނު ތަންފީޒްކުރުމުގައި ކަސްޓަމްސްއިން ފަސްނުޖެހޭނެކަން ވަނީ ހާމަކޮށްފައެވެ.
