ޕްރޮސިކިއުޓާ ޖެނެރަލް (ޕީޖީ) ގެ މަގާމުން ހުސައިން ޝަމީމް ވަކިކުރަން ރައްޔިތުންގެ މަޖިލީހުން ފާސްކޮށްފި އެވެ.
ޝަމީމް ވަކިކުރުމުގެ މައްސަލަ މަޖިލީހުގެ ޖަލްސާގައި އެެޖެންޑާކޮށް، ޖަލްސާ ފެށިތަނާހެން ޝަމީމް ވަނީ ޕީޖީގެ މަގާމުން ރޭ އިސްތިއުފާ ދެއްވައިފައެވެ
ރޭ އޮތް މަޖިލީހުގެ ޖަލްސާއަށް 76 މެންބަރަކު ވަޑައިގެންނެވިއިރު، ޕީޖީ ޝަމީމް މަގާމުން ވަކި ކުރަން 65 މެންބަރަކު ވޯޓު ދެއްވިއެވެ. އޭނާ މަގާމުން ވަކި ކުރަން ނުފެންނަ ކަމަށް 9 މެންބަރަކު ވޯޓު ދެއްވިއެވެ. އަދި ވަކިކޮޅަކަށް ވޯޓު ނުދެއްވާ އެއް މެންބަރުން އިންނެވިއެވެ.
ޝަމީމް މަގާމުން ވަކިކުރަން މަޖިލީހުން ފާސްކުރިއިރު، މަޖިލިހުގެ ޖަލްސާ ފެށުމުގެ ކުޑައިރުކޮޅެއް ކުރިން އޭނާ ވަނީ އިސްތިއުފާ ދެއްވިކަން މީޑިއާއާ ހިއްސާ ކުރައްވައިފަ އެވެ. ނަމަވެސް، މަޖިލިހުގެ ރޭގެ ޖަލްސާގައި، މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ، މަޖިލީހުގެ ވޯޓާ ހަމައަށް ދިޔައިރު އެ ސިޓީ ރައީސް އޮފީހަށް އަދި މަޖިލީހަށް ވެސް ލިބިފައި ނެތް ކަމަށެވެ.
ޝަމީމް ވަކިކުރުމާއެކު 30 ދުވަސް ތެރޭ އާ ޕީޖީއަކު އައްޔަންކުރަން ޖެހޭނެއެވެ. ނަމަވެސް މަޖިލިސް ރެއިން ފެށިގެން ޗުއްޓީއަށް ދާތީ އާ ޕީޖީއަކު އައްޔަންކުރަން ޖަލްސާ ބާއްވާނީ ދައުރުން ބޭރުންކަމަށް ނާޒިމް ވިދާޅުވިއެވެ.
ޝަމީމް ވަކިކުރަން ޖުޑިޝަރީ ކޮމިޓީއަށް ހުށަހެޅުއްވީ ހުޅުދޫ ދާއިރާގެ މެމްބަރު މުހައްމަދު ޝާހިދެވެ. ޝާހިދު ހުށަހެޅުއްވި ސިޓީގައިވާ ގޮތުން ޕީޖީ ޝަމީމް ގާނޫނުއަސާސީއާ ހިލާފަށް އެތައް ކަމެއް ކޮށްފައިވާތީ ޝަމީމަކީ ޕީޖީގެ މަގާމުގައި ހުރުމަށް އެކަށީގެންވާ ބޭފުޅެއް ނޫނެވެ.
ޝަމީމްގެ އިތުބާރު ނެތް ކަމުގެ މައްސަލާގައި އިއްޔެ ޖުޑިޝަރީ ކޮމިޓީއަށް ޝަމީމް ހާޒިރުކުރި އެވެ. އެ ބައްދަލުވުން ސިއްރު ނުކުރަން އެދި ޝަމީމް ސިޓީއެއް ފޮނުއްވި ނަމަވެސް، ޝަމީމަށް ޖަވާބުދާރީވާން ފުރުސަތު ދިނީ ސިއްރުކޮށް ކުރިއަށް ގެންދިޔަ ބައްދަލުވުމެއްގަ އެވެ. އެ ބައްދަލުވުމަށް ފަހު، ޝަމީމް ވަކިކުރަން ފެންނަ ކަމަށް ޖުޑީޝަރީ ކޮމިޓީން ފާސްކޮށް، މައްސަލަ ތަޅުމަށް ފޮނުވި އެވެ.
އިތުބާރު ނެތް ކަމުގެ މައްސަލާގައި ފާހަގަކޮށްފައިހުރި ތުހުމަތުތަކަށް ޝަމީމް ވަނީ އިންކާރު ކުރައްވައިފަ އެވެ. ޝަމީމް ވިދާޅުވީ އެއީ އެއްވެސް ހަގީގަތެއްގެ މައްޗަށް ބިނާވެފައިވާ ތުހުމަތުތަކެއް ނޫން ކަމަށާއި އެއީ މީގެ ކުރިން ޖަވާބުދީ ބާވެފައި ހުރި މައްސަލަތަކެއް ކަމަށް އޭނާ ވިދާޅުވި އެވެ.
ޝަމީމް ޕީޖީގެ މަގާމަށް އައްޔަން ކުރެއްވީ 2019 ވަނަ އަހަރުގެ ޑިސެމްބަރު މަހުގެ އަށް ވަނަ ދުވަހެވެ.
