ދިވެހިރާއްޖޭގައި އުފެދުނު އެންމެ މޮޅު އެއް ފުޓްބޯޅަ ރެފްރީ އަދި ދިވެހި ދައުލަތަށް ގިނަ ދުވަހު ހިދުމަތްކުރައްވާފައިވާ މައްލާ ޅަތުއްތު އަވަހާރަވެއްޖެއެވެ.

އޭނާ އަވަހާރަވީ ސިއްހީ ހާލު ދެރަވެ އިންޑިއާގެ ޓްރިވެންޑްރަމްގެ ހޮސްޕިޓަލެއްގެ އައިސީޔޫގައި ފަރުވާ ހޯއްދަވަމުން އަންނަނިކޮށް މިއަދު މެންދުރު އެވެ.

AD

މައްލާ ޅަތުއްތު، ސަރުކާރުގެ ޚިދުމަތަށް ނުކުމެވަޑައިގަތީ، އުމުރުން 16 އަހަރުގައި، 1964 ވަނަ އަހަރު، ސިފައިންގެ މީހެއްގެ ވަޒީފާއަށެވެ. އޭގެފަހުން ހޯމް އެފެއާޒްގެ ރަޖިސްޓްރޭޝަން ޑިވިޜަންގެ އިނގިރޭސި ކާތިބުކަމާއި، ކުޅިވަރާބެހޭ ބައިގެ ސެކްރެޓެރީކަން ކުރައްވައިފައިވެއެވެ.

މައްލާ ޅަތުއްތު، އެންމެ ގިނަ ދުވަހު ޚިދުމަތް ކުރައްވައިފައި ވަނީ އެސް.ޓީ.އޯ. ގައެވެ. އެގޮތުން، އެސް.ޓީ.އޯ.ގެ ސެކްރެޓެރީއެއްގެ މަގާމު، މައްލާ ޅަތުއްތުއަށް ދެއްވީ، 1976 ވަނަ އަހަރުގެ ޖޫން މަހުގެ 27 ވަނަ ދުވަހުއެވެ. 16 ވަރަކަށް އަހަރު އެސް.ޓީ.އޯ.ގައި ތަފާތު މަގާމުތައް އަދާކުރެއްވިއެވެ. އެންމެފަހުން ހުންނެވީ، ސޭލްސްއާ ބެހޭ ޑިޕާޓްމަންޓްގެ އެސިސްޓެންޓް ޑިރެކްޓަރުގެ މަގާމުގައެވެ.

މައްލާ ޅަތުއްތު ވަނީ، މިނިސްޓްރީ އޮފް ކޮންސްޓްރަކްޝަން އެންޑް ޕަބްލިކް ވާރކްސްގައިވެސް ތަފާތު އެކިއެކި މަގާމުތަކުގައި 11 އަހަރަށްވުރެ ގިނަ ދުވަހު، ޚިދުމަތް ކުރައްވާފައެވެ. މައްލާ ޅަތުއްތު ވަނީ، ޕަބްލިކް ވާރކްސް މިނިސްޓްރީގެ ފައިނޭންސް ސެކްޝަނާއި، މާލޭ ހާބަރ ސެކްޝަން، ވަރަށްގިނަ ދުވަސްތަކެއް ވަންދެން ބަލަހައްޓަވައިފައެވެ. މާ

މައްލާ ޅަތުއްތު އެންމެފަހުން ޚިދުމަތް ކުރެއްވީ، ރައްޔިތުންގެ މަޖިލީހުގެ އިދާރާގައެވެ. ރައްޔިތުންގެ މަޖިލީހުގެ އިދާރާގައި 6 އަހަރަށްވުރެ ގިނަ ދުވަހު ޚިދުމަތް ކުރެއްވިއިރު، އެ އިދާރާގެ އެސިސްޓެންޓް ޑިރެކްޓަރ ޖެނެރަލް ކަމުގެ މަގާމާއި، ޑެޕިއުޓީ ޑިރެކްޓަރ ޖެނެރަލް ކަމުގެ މަގާމު ފުރުއްވިއެވެ. އެންމެފަހުން ފުރުއްވީ، އެ އިދާރާގެ ޑިރެކްޓަރ ޖެނެރަލް ކަމުގެ މަގާމެވެ.

ދިވެހި ދައުލަތަށް43 އަހަރަށްވުރެ ދިގު މުއްދަތެއްގައި ޚިދުމަތް ކުރެއްވުމަށްފަހު، މައްލާ ޅަތުއްތު ރިޓަޔަރ ކުރެއްވީ 20 އެޕްރީލް 2010 ގައެވެ.

މައްލާ ޅަތުއްތުއަކީ، ދިވެހިރާއްޖޭގައި ފުޓްބޯޅަ ރެފްރީކަން، އެންމެމަތީ ފަންތީގައި، ދިގު މުއްދަތެއްގައި ކުރައްވައިފައިވާ ބޭފުޅެކެވެ. މިގޮތުން، ، ދިވެހި ކުޅިވަރުގެ ތަރައްޤީއަށް 52 އަހަރު މައްލާ ޅަތުއްތު ވަނީ އަގުހުރި ޚިދުމަތްތަކެއް ކުރައްވައިފައެވެ. މައްލާ ޅަތުއްތުއަށް ވަނީ ކުޅިވަރުގެ ރޮނގުން 1990 ވަނަ އަހަރު އާންމު ޚިދުމަތުގެ ހިތްވަރު ދިނުމުގެ އިނާމު އަދި 2021 ވަނަ އަހަރު ޝަރަފުވެރިކަމުގެ ޤައުމީ އިނާމު އަރުވައިފައެވެ. 31 ޖުލައި 2019 އިން ފެށިގެން މައްލާ ޅަތުއްތު ގެންދަވަނީ، ފުޓްބޯލް އެސޯސިއޭޝަން އޮފް މޯލްޑިވްސްގެ ޕްރެޒިޑެންޓްގެ އެޑްވައިޒަރުގެ މަގާމު ފުރުއްވާފައެވެ.