އިންޑިއާގެ ބޮޑުވަޒީރު ނަރެންދުރަ މޯދީ އަދި އިންޑިއާ ސަރުކާރުގެ ކައުންސިލު އޮފް މިނިސްޓާސް ހުވާކުރެއްވުގެ ރަސްމިއްޔާތުގައި ބައިވެރިވެވަޑައިގަތުމަށް ގައުމުތަކުގެ އިސްވެރިންނާ، ލީޑަރުން އިންޑިއާއަށް ދަތުރުކުރައްވަމުން އަންނައިރު އިންޑިއާގެ މީޑިއާތަކުގެ އެންމެ ބޮޑު ސަމާލުކަމެއް ހުއްޓިފައިވަނީ ރާއްޖޭގެ ރައީސް ޑރ.މުހައްމަދު މުއިއްޒު އަށެވެ.
ރައީސް މުއިއްޒުގެ މިދަތުރުފުޅަށް އިންޑިއާގެ މީޑިއާތަކުގެ ބޮޑު ސަމާލުކަން ނުލިބެންވީ ސަބަބެއްވެސް ނެތެވެ. އެމްޑީޕީ ސަރުކާރުގެ ވެރިކަމުގައި އިންޑިއާ ސިފައިން ރާއްޖެއިން ފޭބުމަށް ގޮވާލާ އޭރު އިދިކޮޅު ފަރާތްތަކުން ބޭއްވި ‘އިންޑިއާ އައުޓް’ އެއްވުންތަކުގައި ރައީސް މުއިއްޒު އާއި މިހާރު ރާއްޖޭގެ ކެބިނެޓްގައި ތިއްބެވި އެންމެ އިސްވެރިން ފެނިގެން ދިޔައެވެ. މި ސަރުކާރުން ވެރިކަމަށް އައުމަށްވެސް ބޭނުންކުރި އެންމެ ވަރުގަދަ އެއް ހަތިޔާރަކީ އިންޑިއާ ސިފައިން ރާއްޖެއިން ބާލާނެކަމުގެ ޔަގީންކަމަށެވެ. މި ސަރުކާރު ވެރިކަމާ ހަވާލުވެ އިންޑިއާ ސިފައިން ރާއްޖެއިން ބޭލުމުގެ މަސައްކަތް ފެށި އިރު މިހާރު ރާއްޖޭގައި އިންޑިއާ ސިފައިން ނެތްކަމަށް ސަރުކާރުން ވަނީ ހާމަކޮށްފައެވެ.
މީގެ އިތުރުން ރާއްޖޭގެ ތިން ޑެޕިއުޓީ މިނިސްޓަރުން މޯދީ އަށް ނިސްބަތްކޮށް ދައްކާފައިވާ ވާހަކަތަކާ ގުޅިގެން އިންޑިއާ ސަރުކާރާއި އާންމުންގެ މެދުގައިވެސް ވަނީ ރުޅިވެރިކަން އުފެދިފައެވެ. މި ރުޅިވެރިކަމާއެކު އިންޑިއާއިން ސޯޝަލް މީޑިއާގައި ފަތުރުވެރިން، ރާއްޖެ ބޮއިކޮޓް ކުރުމަށް ގޮވާލާ ބޮޑު ކެމްޕޭނެއް ވެސް ފެށިއެވެ.
އެހެންކަމުން ވެރިކަމާ ހަވާލުވެ ވަޑައިގަތުމަށްފަހު ރައީސް މުއިއްޒު އިންޑިއާއަށް ކުރައްވާ ފުރަތަމަ ދަތުރައް އެންމެންގެ ލޯ ނުހުއްޓެން ވީ ސަބަބެއްވެސް ނެތެވެ. އިންޑިއާއަށް ވަޑައިގަންނަވާ ލީޑަރުންނަށް މަރުހަބާ ކިޔުމަށް ބޯޑުތައް ބަހައްޓާއިރު، ރައީސް މުއިއްޒުއަށް މަރުހަބާ ކިޔުމަށް އިންސްޓޯލްކޮށްފައިވާ ބޯޑެއްގެ ފޮޓޯއެއް އެންޑީޓީވީގެ ވެބްސައިޓުގައި ދައްކާފައި ވަނީ ދެގައުމުގެ ދެމެދުގައި އޮތް ‘ފިތުނަވެރިކަމުގައި’ ވެސް އިންޑިއާއިން ރައީސް މުއިއްޒަށް ހޫނު މަރުހަބާއެއް ކިޔަން ތައްޔާރަށް އޮތް ކަމަށެވެ.
އެކްސްޓާނަލް އެފެއާޒް މިނިސްޓްރީގެ ބޭރުގައި މޯދީ އާއި ރައީސް މުއިއްޒުގެ ފޮޓޯ ޖަހާފައިވާ ބޯޑުގައި ލިޔެފައި ވަނީ ‘ވެލްކަމް ޓު އިންޑިއާ’އެވެ. އިންޑިއާގެ މީޑިއާތަކުން ވަނީ ރައީސް މުއިއްޒުއަށް މޯދީ ދެއްވި ދައުވަތަކީ ދެގައުމުގެ ދެމެދުގައި އުފެދިފައިވާ ފިތުނަތައް ނިމުމަކަށް ގެނައުމަށް ކުރި ކަމެއްގެ ގޮތުގައި ސިފަކޮށްފައެވެ.
