ރާއްޖޭގެ ފުރަތަމަ ޑިވެލޮޕްމަންޓް ބޭންކު ޖުލައި މަހު ހުޅުވަން ހަމަޖެހިފައިވާކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
މި ބޭންކު ހުޅުވުމުގެ ބޭނުމަކީ ޑޮލަރުގެ ކުރިމަތީ ރުފިޔާ ބާރުވެރި ކުރުމަށް ސަރުކާރުންކުރާ މަސައްކަތް އެއްބާރުލުން ދިނުމެވެ.
ޔޫއޭއީގެ އިންޓަނޭޝަނަލް ފްރީޒޯން އޮތޯރިޓީ (އިފްޒާ) އާ ދެމެދު ސްޕެޝަލް އިކޮނޮމިކް ޒޯން (އެސްއީޒެޑް) ގެ ބިޔަ ދެ މަޝްރޫއެއް ހަވާލުކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އިކޮނޮމިކް މިނިސްޓަރ މުހައްމަދު ސައީދު ވިދާޅުވީ ރާއްޖޭގެ ބޭރު ފައިސާގެ ބާޒާރުގައި ހުރި މައްސަލަތައް ހައްލުކުރުމަށް ސަރުކާރުން މަސައްކަތް ކުރަމުން އަންނަ ކަމަށެވެ.
ޑޮލަރުގެ ކުރިމަތީގައި ދިވެހި ރުފިޔާ ބާރުވެރިކުރުމަށް ސަރުކާރުން މަސައްކަތްކުރަމުންދާ ކަމަށް ސައީދު ފާހަގަކުރެއްވިއެވެ. މިމަސައްކަތް ކުރަމުންދަނީ ދުނިޔޭގެ ބޮޑެތި މާކެޓުތަކާ ގުޅިގެންކަމަށް ވިދާޅުވެފައިވެއެވެ. ޗައިނާ އަދި އިންޑިއާ ފަދަ މާކެޓުތަކާ އެކު ބާރަށް މަސައްކަތްކުރަމުންދާ ކަމަށް މިނިސްޓަރު މައުލޫމާތު ދެއްވިއެވެ.
ރާއްޖޭގެ ދާއިމީ ތަރައްޤީއަށް ބޭނުންވާ އެހީތެރިކަމާއި އެއްބާރުލުން ދިނުމުގެ ގޮތުން ރާއްޖޭގައި ގާއިމުކުރާ ފުރަތަމަ ޑިވެލޮޕްމަންޓް ބޭންކު ޖުލައި މަހު ހުޅުވުމަށް ހަމަޖެހިފައިވާ ކަމަށް ސައީދު ވިދާޅުވިއެވެ. މީގެ ސަބަބުން ރާއްޖޭގެ ތަރައްޤީގެ މަޝްރޫއުތައް އިތުރަށް ހަލުއިވެގެން ދާނެ ކަމަށް އުއްމީދުކުރައްވާ ކަމަށާއި، މިކަމާއެކު ރާއްޖޭގެ ތާރީހަށް ބަދަލު އަންނާނެ ކަމަށް ބެލެވޭ ކަމަށް ފާހަގަކުރެއްވިއެވެ.
ސަރުކާރުގެ އިތުރުން އަމިއްލަ ކުންފުނިތަކުން ވެސް މި ބޭންކުގައި އިންވެސްޓް ކުރުމަށް ފެހި ސިގްނަލް ލިބިފައިވާ ކަމަށާއި، މިކަމުގެ ނަތީޖާ ކުރިއަށް އޮތް ފަސް އަހަރުތެރޭ ފެންނާނެ ކަމަށް އުއްމީދުކުރައްވާ ކަމަށް ވެސް ވިދާޅުވިއެވެ.
