ޗައިނާގެ ޝެންޒޫ ގައި މިމަހު 15 އިން 17 އަށް ބޭއްވި އޭޝިއަން ރޯވިން ކޯސްޓަލް ޗެމްޕިއަންޝިޕް 2017 ގައި ބައިވެރިވި ގައުމީ ރޯވިންޓީމު ބްރޮންޒް މެޑެއްޔަކާއެކު މިއަދު ރާއްޖެ އަތުވެއްޖެއެވެ.
މިއީ ރާއްޖޭގެ ރޯވިންގެ ތާރީޚުގައި ގައުމީޓީމަށް ލިބުނު ފުރަތަމަ މެޑެލް އެވެ. ރާއްޖެއަށް އެ މެޑެލް ހޯދައިދީފައިވަނީ އަންހެން ސިލްގަލް ކެޓެގަރީގައި ވާދަކުރި ސ. ހިތަދޫ، ކޫލްއެއާ، ފާތުމަތު މިނާ އަހުމަދެވެ. އޭނާ ފައިނަލަށް ދަތުރުކޮށްފައިވަނީ 7 ގައުމަކާ ވާދަކޮށް އެގައުމުތައް ކަޓުވައިލުމަށްފަހުގައެވެ. ފައިނަލުގައި އޭނާ ވާދަކޮށްފައިވަނީ 4 ގައުމާއެވެ. ރޯވިންގެ ގިނަދުވަސްވީ ގައުމުތަކާ ވާދަކޮށް ތިންވަނަ ލިބުމަކީ ރާއްޖެއަށް ލިބުނު ވަރަށްބޮޑު ކުރިއެރުމެވެ. މިކެޓެގަރީން އެއްވަނަ ހޯދީ ޗައިނާއެވެ. ދެވަނަ ހޯދީ ތައިލެންޑެވެ.
މުބާރާތަށްފަހު ރޯވިން އެސޯސިއޭޝަންގެ ރައީސް އަހުމަދު ހަބީބު ވިދާޅުވީ މިއީ ފެށުމެއް ކަމަށެވެ. ކުރިއަށްއޮތާގައި އިންޓަރނޭޝަނަލް މުބާރާތްތަކުން މިއަށްވުރެ ރަނގަޅު ނަތީޖާއެއް ހޯދުމަށް ގައުމީ ރޯވިން ޓީމުން މަސައްކަތްކުރާނެ ކަމަށް އޭނާ ވިދާޅުވިއެވެ. އެކަމަށް ތައްޔާރުވުމަށްޓަކައި ގައުމީޓީމަށް އިތުރު ތަމްރީންތައް ބޭނުންވާ ކަމަށް އޭނާ ވިދާޅުވިއެވެ. އަދި ރޯވިންގެ އާބާދީ ރާއްޖޭގައި ބޮޑުކޮށް ރޯވިންގެ ތެރެއަށް ވަރުގަދަ ޒުވާނުން ނުކުތުމަކީ ރަނގަޅު ނަތީޖާ ނެރުމަށް މިވަގުތަށް ކުރަންޖެހޭ އެންމެ މުހިންމު އެއްކަންތައް ކަމަށް އޭނާ ވިދާޅުވިއެވެ.
“މިހާއޮތް ގައުމީ ސްކޮޑުގެ ހުނަރަށް ބަލާއިރު ގޯހެއްނޫން. މިއީވެސް ހުނަރުހުރެގެން ލިބުނު ނަތީޖާއެއް. އެކަމަކު އިތުރު ތަމްރީންދީ ޓީމް މިހާރަށްވުރެ ވަރުގަދަކުރަން އެބަޖެހޭ. ކުރިއަށްއޮތްތަނުގައި މިއަށްވުރެވެސް ވަރުގަދަ ޓީމެއް ރާއްޖެއިން ނެރެންއެބަޖެހޭ. އެކަންކުރެވޭނީ މި ކުޅިވަރުގެ ތެރެއަށް ގިނަޒުވާނުންވަދެގެން. ޓީމްވަރުގަދަވާނީ މިކުޅިވަރުގައި ބައިވެރިވާ ޒުވާނުންގެ އަދަދުވެސް އިތުރުވެގެން،” ހަބީބު ވިދާޅުވިއެވެ.
ހަބީބު ވިދާޅުވީ މިކާމިޔާބީގެ ފަހަތުގައި ވަރަށްގިނަ ފަރާތްތައް ހިމެނޭ ކަމަށެވެ. އޭގެ ތެރޭގައި އައްޑޫސިޓީކައުންސިލާއި، ކުޅިވަރާބެހޭ މިނިސްޓްރީއާއި، އައްޑޫސިޓީގެ ބައެއް ސްކޫލްތަކާއި އަދިވެސް އިތުރުފަރާތްތައް ހިމެނޭ ކަމަށް އޭނާ ވިދާޅުވިއެވެ.
އޭނާ ވިދާޅުވީ ފަލިޖެހުން ނުވަތަ ރޯވިންއަކީ ރާއްޖެއާ ވަރަށްބޮށްގުޅޭ އަދި ކާމިޔާބު ހޯދިދާނެ ކުޅިވަރެއް ކަމަށެވެ. އެކަން މިހާރުގެ ގައުމީޓީމުންވެސްވަނީ ދައްކުވައިދީފައި ކަމަށް އޭނާ ވިދާޅުވިއެވެ.
ރާއްޖޭގެ ގައުމީ ރޯވިންޓީމް ފުރަތަމަ މެޑެލް ހިފައިގެން މިއަދު ރާއްޖެ އައުމުން ސޯޝަލް މީޑިއާ މެދުވެރިކޮށް އެކިފަރާތްތަކުން ގެންދަނީ ޓީމަށް ތަހުނިޔާ ފޮނުވަމުންނެވެ. އޭގެތެރޭގައި އައްޑޫސިޓީ ކައުންސިލްވެސް ހިމެނެއެވެ. އެހެންނަމަވެސް ޓީމް މިއަދު ރާއްޖެއައިރު ޓީމަށް މަރުހަބާ ކިޔަން އެއްވެސް ބަޔަކު ގަން އިންޓަރނޭޝަނަލް އެއާޕޯޓަށް ގޮސްފައިނުވާކަންވަނީ ފާހަގަވެފައެވެ.
