ޗައިނާގެ ޝެންޒޫ ގައި މިމަހު 15 އިން 17 އަށް ބޭއްވި އޭޝިއަން ރޯވިން ކޯސްޓަލް ޗެމްޕިއަންޝިޕް 2017 ގައި ބައިވެރިވި ގައުމީ ރޯވިންޓީމުން ދިވެހިތާރީޚުގައިވެސް ފުރަތަމަ ފަހަރަށް މެޑެލް އުފުލާލައިފިއެވެ.
މުބާރާތުގެ އަންހެން ސިލްގަލް ކެޓެގަރީގައި ވާދަކޮށް ރާއްޖެވަނީ ތިންވަނަ ހާސިލް ކޮށްފައެވެ. މި ޝަރަފް ރާއްޖެއަށް ފުރަތަމަ ފަހަރަށް ހޯދައިދިނީ ސ. ހިތަދޫ، ކޫލްއެއާ، ފާތުމަތު މިނާ އަހުމަދެވެ. އޭނާ ފައިނަލަށް ދަތުރުކޮށްފައިވަނީ 7 ގައުމަކާ ވާދަކޮށް އެގައުމުތައް ކަޓުވައިލުމަށްފަހުގައެވެ.
މިކެޓެގަރީން އެއްވަނަ ހާސިލްކުރީ ޗައިނާއެވެ. ދެވަނަ ހާސިލްކުރީ ތައިލެންޑެވެ.
މުބާރާތުގެ ފިރިހެން ކެޓަގަރީގައި ވާދަކޮށް ރާއްޖޭގެ ޓީމްވަނީ 4 ވަނަ ހޯދައިފައެވެ. މިއީވެސް ބައިނަލް އަގުވާމީ މުބާރާތެއްގައި ގައުމީ ރޯވިން ޓީމަށް މިހާތަނަށް ހޯދިފައި ނުވާވަރުގެ ބޮޑު ކާމިޔާބީއެކެވެ.
މި މުބާރާތުން ހޯދި ފަޚުރުވެރި ކާމިޔާބީއަށްފަހު ދިވެހި ޓީމް އެނބުރި ރާއްޖެ އަންނާނީ މާދަމާ ހެނދުނު 8:20 ގައި ގަމަށް އަންނަ ޔޫއެލް ފުލައިޓުންނެވެ.
