އެކަކަށް ވުރެ ގިނަ މީހުނާ އިނދެގެން އުޅޭ ފިރިހެނުންނަށް ލާޒިމު ވެގެންވާ އަނެއް ކަމަކީ ކޮންމެ އަނތްބަކަށްވެސް ދިރިއުޅެން އެކަށީގެންވާ ތަނެއް ދެއްކުމެވެ. އެއް އަނތްބަކަށް މޮޅު ގެއެއް ދީފައި އަނެއް އަނތްބަކު ޙާލުގައި އުޅެން ޖެހޭ ގޮތް އެއްގޮތަކަށްވެސް ހަދައިގެން ނުވާނެ އެވެ. ދަރިން ތިބި ނިސްބަތަކުން ގޭގެ ކުޑަ ބޮޑު މިނާއި، ވަސީލަތްތައް ތަފާތު ކުރި ކަމުގައި ވިޔަސް، އެއްވެސް ކަމެއްގެ ނުވަތަ އެއްޗެއްގެ މޮޅު، ދެރަ މިނަކަށް ބަދަލެއް ގެނެސްގެން ނުވާނެ އެވެ.
ޢަދްލުވެރިވުން މިހިސާބުން ނިމުނީއެއް ނޫނެވެ. ފައިސާއާއި، އަންނައުނު ދިނުމުގައި ވެސް ހުރިހައި އަނބިން ހަމަހަމަ ކުރަން ވާނެއެވެ. މީގެ މާނައަކީ ކޮންމެ އަނތްބަކަށް ވެސް އެއްކަހަލަ އެއްޗެއް ހޯދައި ދިނުމެއް ނޫނެވެ. އަނބިންގެ ބޭނުންތައް ފުއްދައި ދިނުމުގައި ބަލަން ވާނީ ޢަދްލުވެރިވުމަށް ސަމާލުކަން ދީގެން، އެ އަނތްބަކަށް ބޭނުންވާ އެއްޗެއް ހޯދައި ދެވޭތޯއެވެ. ފައިސާ ދޭނަމަ ކޮންމެ އަނތްބަކަށްވެސް ދޭން ވާނީ އެއް ވަރަކަށެވެ. ހަދިޔާ ދިނުމުގައި ވެސް ހަމަހަމަކަން ހިފަހައްޓަން ވާނެއެވެ. ހަދިޔާއަށް ދޭ އެއްޗަކީ އެކައްޗަކަށް ވުން ލާޒިމެއް ނޫނެވެ. އެހެން ނަމަވެސް އެއްވަރެއްގެ އަގުހުރި އެއްޗަކަށް ވާން ވާނެއެވެ. (އަނބިންނަށް ކުރާ ޚަރަދުގައި ދަރިންގެ ޚަރަދުތަކެއް ނުހިމެނެއެވެ.)
ޚުލާޞާާ
އިސްލާމް ދީނުގައި ފިރިހެނުންނަށް އެކަކަށް ވުރެ ގިނަ މީހުނާ އިނުމުގެ ހުއްދަ ދެއްވާފައިވާ ކަމީ އެއްވެސް އޮޅުމެއް ނެތި ސާފުކޮށް އެނގެން އޮތް ކަމެކެވެ. ބައެއް ޢިލްމުވެރިން ވިދާޅުވާ ގޮތުގައި އެއީ ކުރުން އައުލާ ވެގެންވާ ކަމެއްވެސް މެއެވެ. ޝައިޚް އިބްނު އުޘައިމިން ވިދާޅުވެފައި ވެއެވެ. “ގިނަ އަނބިންގެ މެދުގައި ޢަދްލުވެރިކަމާއެކު ކަންތައް ކުރުމުގެ ޤާބިލްކަން ލިބިފައިވާ މީހަކު ނަމަ ފުރަތަމަ އަނބިމީހާގެ އިތުރަށް އެކަކާ ނުވަތަ ދެމީހުނާ ނުވަތަ ތިން މީހުނާ އިނުމަކީ ހުއްދަ ކަމެކެވެ. ތިޔަބައިމީހުންގެ ތެރެއިން ކޮންމެ ފިރިހެނަކަށް އަހަރެން ނަސޭހަތްތެރިވަނީ ކޮންމެ މީހަކު ހަތަރު މީހުނާ އިނުމަށް ފަހު، އެންމެ ދަރިއެއްގެ ބަދަލުގައި، ކޮންމެ އަހަރަކު ހަތަރު ދަރިން ހޯދާށެވެ. މިއީ އިސްލާމީ އުއްމަތުގެ އާބާދީ އިތުރު ކުރުމަށާއި، ޢަދަދުގެ ގޮތުންނާއި، ފެންވަރުގެ ގޮތުން ކާފަރުންގެ މައްޗަށް (މުސްލިމުންގެ ޢަދަދު) އިތުރު ކުރުމުގެ ގޮތުން ކުރަން ޖެހޭ ކަމެކެވެ.” (އަލްޙަރަމައިން އޮންލައިން ނިވްސްލެޓަރ، ވޮލިއުމް 4، ޢަދަދު 6، ޞަފަރް 1421)
ﷲ ސުބްޙާނަހޫ ވަތަޢާލާ އާއި، ކީރިތި ރަސޫލާ މުޙައްމަދު ޞައްލަﷲ ޢަލައިހި ވަސައްލަމް ވަނީ ފިރިހެނުން އެކަކަށް ވުރެ ގިނަ މީހުނާ އިނުމުގެ ޤާނޫނުތަކާއި، ޝަރުޠުތައް ކަނޑައަޅުއްވައި އަންގަވައިފައެވެ. ކަނޑައެޅި ބަޔާން ވެފައިވާ ޤާނޫނަކަށް ބަދަލު ގެންނަން މަސައްކަތް ކުރުމަކީ ކުށެކެވެ. ފިރިހެނަކު އެކަކަށް ވުރެ ގިނަ މީހުނާ އިނުމުގައި ފައިދާތަކެއް އެބަހުރިކަމާ މެދަކު އެއްވެސް ޝައްކެއް ނެތެވެ. އޭގެ ތެރޭގައި ފިރިހެނުންނާއި، އަންހެނުންގެ އަބުރު ރައްކާތެރި ވުމާއި، ގިނަ ދަރިން ލިބުން ހިމެނެއެވެ. ރަނގަޅު ގޮތުގައި މި ޙައްޤުގެ ބޭނުން ކޮށްފިނަމަ އަންހެނުންނަށް ވަރަށް ގިނަ ފައިދާ ކުރާނެއެވެ. މީހަކާ ނީނދެ ހުރުމަށް ވުރެ، މީހަކާ އިނދެގެން އުޅޭ މީހަކާ އިނދެގެން އުޅުން އަންހެނުންނަށް މާފައިދާ ބޮޑެވެ.
ފިރިމީހާ އެހެން މީހަކާ އިނީމާ، ދޮށީ އަނބިކަނބުލޭގެ ކުރާ ހިތާމަތަކާ ބެހޭ ގޮތުން ޝައިޚް އެސް. އަލްމުނައްޖިދަށް ދެންނެވުނު ސުވާލަކަށް ޖަވާބު ދެއްވަމުން އޭނާ ވިދާޅުވި އެވެ. ފިރިހެނަކު ދެ އަނތްބަށް މީހަކާ އިނީމާ ދޮށީ އަނބިކަނބުލޭގެ ކުރާނޭ ހިތާމައަކީ، ކުރިމަތިލާން ޖެހޭނެ މައްސަލަކަށް ވުމަކީ ދުރުކަމެއް ނޫނެވެ. މި ހިތާމަ މުޅިން ފިލުވައިލާން ނުވަތަ ކުޑަ ކުރަން ވަކި އުޞޫލުތަކެއް ﷲ ސުބްޙާނަހޫ ވަތަޢާލާ ވަނީ ކަނޑައަޅުއްވައިފައެވެ. އޭގެ ތެރޭގައި ޢަދްލުވެރި ވުމާއި، ކެތްތެރިވުން ހިމެނެއެވެ. ކޮންމެ ގޮތެއް ވިޔަސް ފިރިމީހާ އެހެން މީހަކާ ނުވަތަ އެހެން މީހުނާ އިނުމުގެ ސަބަބުން ކުރިމަތިލާން ޖެހޭ ހިތާމަތަކެއް ހުރުމަކީ ދެކޮޅު ހެދެން ނެތް ޙަޤީޤަތަކަށް ވީ ނަމަވެސް، އެއީ ފިރިހެނަކު އެކަކަށް ވުރެ ގިނަ މީހުނާ އިނުން މަނާ ކުރެވޭނޭ ސަބަބެއް ނޫނެވެ. އިސްލާމް ދީން އައީ އިންސާނުންގެ ފައިދާއަށްޓަކައި ބާވައިލެއްވި ދީނެއްގެ ގޮތުގައެވެ. ގެއްލުންދެނިވި ކަންތައްތައް، ފައިދާ ކުރުވަނިވި ކަންތައްތަކަކަށް ބަދަލު ކުރުމުގެ ހަމަތަަކާ އެކުގައެވެ. އިސްލާމީ ޝަރީޢަތުގައިވާ ހަމަތަކުގެ މަތީން ފިރިހެނަކު އެކަކަށް ވުރެ ގިނަ މީހުނާ އިނުމަކީ އިންސާނުންގެ މަޞްލަޙަތާއި، ފައިދާއަށްޓަކައި އޮތް ކަމެއްކަމާ މެދަކު އެއްވެސް އޮޅުމެއް ނެތެވެ. އެ ކަމުގެ ފައިދާ ތަކުގެ ތެރޭގައި އެންމެ މީހަކާ އިނދެގެން އުޅޭ އުޅުމުގައި ޖިންސީ ގޮތުން އަލާ ނުކެނޑޭ މީހުންނަށް އެކަން ހަމަ ޖެއްސޭނޭ ގޮތެއް ވުމާއި، ފިރިއަކު ނެތް އަންހެނެއްގެ ޢިއްފަތްތެރިކަން ސަލާމަތް ކުރެވުމާއި، އެ ކަނބުލޭގެ ކުރަން ޖެހޭ ޚަރަދު ބަރަދުގެ ކަންތައްތައް ހަމަޖެހުމާއި، މުސްލިމުންގެ އާބާދީ އިތުރުވުމާއި، ހަނގުރާމައިގައި މަރުވާ ފިރިހެނުންގެ ސަބަބުން ހުވަފަތް ވެފައި ތިބޭ އަންހެނުންނަށް ދިރިއުޅެވޭނޭ ގޮތް މެދުވެރިވުމާއި، މި ފަދަ އެތައް ފައިދާއެއް އެކަމުގައި ހިމެނެއެވެ. ފިރިހެނަކު އެކަކަށް ވުރެ ގިނަ މީހުނާ އިނުމުގެ ސަބަބުން ދިމާވާ ނޭދެވޭ ކަންތައްތަކަށް ބަލައިލާ އިރު އެ ކަންތައް ވެފައި ވަނީ ފައިދާ އާ އަޅައި ބަލާ އިރު، ވަރަށް މަދު ކަންތައްތަކެއް ކަމުގައެވެ. ނުވަތަ އެ ކަންތައްތަކަކީ މި އިޚްތިޔާރު ނަހަމަ ގޮތެއްގައި ބޭނުން ކުރުމުގެ ނަތީޖާ ކަމުގައެވެ.