ގެއްލުވާލާފައިވާ ނޫސްވެރިޔާ ރިޟުވާނުގެ މައްސަލައިގާ އިސްމާއިލް އަބްދުއްރަހީމް (އިސޫ) އާއި އަހުމަދު އިސްމާއިލް (އަހަނދު) ހައްޔަރުކޮށްފިއެވެ.
އެ ދެ މީހުން ހައްޔަރުކޮށްފައިވަނީ މިއަދު ހެނދުނުގެ ވަގުތެއްގައެވެ. އޭގެތެރެއިން އިސޫ ހައްޔަރުކޮށްފައިވަނީ ކާނިވާ ސަރަހައްދުގެ ކެފޭއެއްގައި ސައިބޯން އިންދައެވެ. ނަމަވެސް އަހަނދު ހައްޔަރުކުރީ ކޮންތަނަކުންކަން ސާފުވާގޮތް އަދިވަނީ ނުވެފައެވެ.
އެ ދެމީހުން ވެސް ހައްޔަރުކޮށްފައި ވަނީ 2014 ވަނަ އަހަރު ރިޟުވާން ވަގަށް ނެގުމަށްފަހު މަރާލުމުގައި އިސްކޮށް ހަރަކާތްތެރިވި ކަމަށް ތުހުމަތު ކޮށް ކަމަށް ވަނީ މައުލޫމާތު ލިބިފައެވެ.
މިއަދު ހައްޔަރުކުރި އިސޫއަކީ ސީރިއާގެ ހަނގުރާމައަށް ދާން އުޅުމުގެ ތެރޭގައި ތުރުކީ ބޯޑަރު ކައިރިން 2015 ވަނަ އަހަރު ހައްޔަރުކުރި މީހެކެވެ. އަދި މާރާމާރީއާއި ޓެރަރިޒަމްގެ މައްސަލަތަކެއްގައި މީގެ ކުރިން އޭނާ ހައްޔަރުކޮށްފައިވެއެވެ. އަހަނދަކީ ވެސް އެކި މައްސަލަތަކުގެ ކުށުގެ ރެކޯޑު އޮންނަ އަދި ރާއްޖޭގައި ހަރަކާތްތެރިވާ ގޭންގެއްގެ އިސް މީހެއް ކަމަށް ފުލުހުން ތުހުމަތުކުރާ މީހެކެވެ.
އޮގަސްޓް 8، 2014 ވަނަ ދުވަހުގެ ރޭ ވަގަށް ނެގި އަހްމަދު ރިޟުވާންގެ މަރުގެ ތަހުގީގު ނިންމައި ކޮމިޝަނުގެ ހޯދުންތައް މިއަހަރު މެދުތެރޭ ލިބޭނެކަމުގެ ޔަގީންކަން ރިޔާސީ ކޮމިޝަނުން ދީފައިވާ ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ ވިދާޅުވެފައެވެ. އެއީ މިއަހަރަށް ރައްޔިތުންގެ މަޖިލިސް ހުޅުވުމަށްޓަކައި ދެއްވި ރިޔާސީ ބަޔާނުގައެވެ.
