ރަމަޟާން މަހު ގޭބިސީތަކުން ކުނި ނަގާނީ ރޭގަނޑު އަށަކުން މެންދަމު ބާރައަށް ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.
ވެމްކޯ އިން ބުނީ ވޭސްޓް ޓްރާންސްފަރ ސްޓޭޝަންގެ ޚިދުމަތް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9 ން ހަވީރު 5 ޖަހަންދެން އަދި ރޭގަނޑު 8 ން ދަންވަރު 1 ޖަހަންދެން ލިބޭނެ ކަމަށެވެ. މި ޚިދުމަތް ހުކުރު ދުވަހު ދޭނީ މެންދުރުފަހު 2 ން ހަވީރު 5 އަށް އަދި ރޭގަނޑު 8 ން ދަންވަރު 1 ޖަހަންދެން ލިބޭނެ ކަމަށް ބުންޏެވެ.
މީގެ އިތުރުން ކޮމަރޝަލް ކަލެކްޝަން ހުކުރު ދުވަސް ފިޔަވައި އެހެން ދުވަސްތަކުގައި ހެނދުނު 9 ން ހަވީރު 4 ޖަހަންދެން އަދި ރޭގަނޑު 10 ން ފަތިހު 4 ޖަހަންދެން ކުރިއަށް ގެންދާނެކަމަށާއި ހުކުރު ދުވަހު ކުނި ނަގާނީ މެންދުރުފަހު 2:00 އިން ހަވީރު 5:00 އަށް އަދި ރޭގަނޑު 10:00 އިން ފަތިހު 4:00 އަށް ކަމަށް ވެސް ވެމްކޯއިން ބުނެއެވެ.
“ރަމަޟާން މަހު މާލެ ސަރަހައްދުގައި ކޯލް އެންޑް ޕިކް-އަޕް ސަރވިސް ގެ ޚިދުމަތް ދޭނީ ހެނދުނު 9:00 އިން ހަވީރު 4:00 އަށް. ރޭގަނޑު 8:00 އިން ދަންވަރު 1:00 އަށް. މި ޚިދުމަތް ހުކުރު ދުވަހު މެންދުރުފަހު 2:00 އިން ހަވީރު 5:00 އަށް އަދި ރޭގަނޑު 8:00 އިން ދަންވަރު 1:00 އަށް.” ވެމްކޯ އިން ބުންޏެވެ.
ވެމްކޯ އިން ބުނީ އެ ކުންފުނީގެ މައި އޮފީސް ހުޅުވާފައި ހުންނާނީ އާދީއްތަ އިން ބުރާސްފައްޗަށް ކޮންމެ ދުވަހަކު ހެނދުނު 9:00 އިން މެންދުރުފަހު 1:00 އަށް ކަމަށެވެ. އަދި ކޯލް ސެންޓަރުގެ ޚިދުމަތް ހުކުރުދުވަސް ފިޔަވައި ކޮންމެ ދުވަހަކުވެސް ހެނދުނު 9:00 އިން މެންދުރުފަހު 2:00 އަށް ލިބޭނެ ކަމަށެވެ.
މީގެ އިތުރުން ރޭގަނޑު 9:00 އިން 00:00 އަށް އަދި ހުކުރު ދުވަހު ރޭގަނޑު 9:00 އިން 00:00 އަށް ކޯލް ސެންޓަރުގެ ޚިދުމަތް ދޭނެ ކަމަށް ވެސް ވެމްކޯއިން ބުނެއެވެ.
ވެމްކޯ އިން ބުނީ ރޯދަ މަހު މަގުމަތި ފޮޅައި ސާފުކުރާނީ ރޭގަނޑު 9:00 އިން ދަންވަރު 3:00 އަށް ކަމަށެވެ.
