އައްޑޫ ސިޓީގެ ގުޅިފައިވާ ރަށްރަށަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް ބޭނުންވާ ދެ ޖަނަރޭޓަރު މިރޭ އައްޑުއަށް ގެނެސްފިއެވެ.
މި ދެ ޖަނަރޭޓަރު ބޭލުމުގެ މަސައްކަތް މިހާރުދަނީ ކުރަމުންނެވެ. އެމަސައްކަތް ކުރަމުންދާއިރު ސަރުކާރުގެ އިސްވެރިންނާއި އާންމު ރައްޔިތުންގެ ތެރެއިން ބައެއް މީހުން ގެންދަނީ އެ މަސައްކަތަށް އެހީތެރިކަން ފޯރުކޮށް ދެމުންނެވެ.
އައްޑުއަށް ދިމާވެފައިވާ ކަރަންޓުގެ މައްސަލަ ހައްލު ކުރުމަށް މިރޭ އައްޑުއަށް ގެނެސްފައިވަނީ 1.1 މެގަވޯޓްގެ ޖަނަރޭޓަރަކާއި 1.2 މެގަވޮޓްގެ ޖަނަރޭޓަރެކެވެ. ޖަނަރޭޓަރު ބޭލުމުގައި އިސްވެ ހަރަކާތްރިވެފައިވަނީ ފެނަކައާއި، ހިތަދޫ ޕޯޓުގެ މުވައްޒަފުން ކަމަށް މައުލޫމާތު ލިބިފައިވެއެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ޝަރީފް އާދަމް ވިދާޅުވީ ބާޖުން ޖަނަރޭޓަރުތައް ބާލައިގެން މިރެއިން މިރެއަށް މަސައްކަތް ފަށައިގެން ކުރިއަށް ގެންދާނެ ކަމަށެވެ. މި ޖަނަރޭޓަރުތައް އިންސްޓޯލް ކުރުމަށްޓަކައި 20 ޓެކްނީޝަނުން މަސައްކަތް ކުރާނެ ކަމަށްވެސް އޭނާ ވިދާޅުވިއެވެ. އެމީހުން މަސައްކަތް ކުރާނީ ދެ ގްރޫޕަކަށް ބަހައިލައިގެން އެއްފަހާރާއެވެ.
އައްޑޫގެ އަވަށްތަކަށް ކަރަންޓުގެ މައްސަލަ ދިމާވެފައިވާތާ ދުވަސްކޮޅެއް ވެއްޖެއެވެ. ދުވާލާއި ރޭގަނޑު ދޭތެރެ ދޭތެރެއިން ގޭގެއިން ކަރަންޓް ކެނޑެމުންދާތީ ރައްޔިތުންނަށްވަނީ ވަރަށް ބޮޑު ދަތިކަމަކަށްވެފައެވެ.
