އައްޑޫގެ ތަރައްގީއަށް ހުރަސްއެޅުން ހުއްޓާލުމަށް އައްޑޫ ފޭދޫ ދާއިރާގެ މެމްބަރު މުހައްމަދު ނިހާދު ގޮވާލައްވައިފިއެވެ.
އޭނާ ކުރައްވާފައިވާ ޓްވީޓެއް ގައި ވަނީ ތިމާވެށި ފެންނަނީ އައްޑޫގެ ބިން ހިއްކަންވީމަ ތޯ ސުވާލުކުރައްވާފައެވެ. އަދި ބިން ހިއްކައިފި ނަމަ އައްޑޫގެ ތިމާވެއްޓަށް އިޔާދަނުކުރެވޭ ވަރުގެ ގެއްލުންތަކެއް ވެދާނެ ކަމަށް ބުނާ ފަރާތްތަކަށް ޢިޝާރާތް ކުރައްވާ ނިހާދު ވަނީ އެހެން ސަރަހައްދުތަކުގެ ބިންތައް ހިއްކާ ނިމޭއިރު ބަސް ނުބުނަނީ އޭގެއިން ކޮން މަންފާއެއް ލިބޭތީތޯ ސުވާލުކުރައްވާފައެވެ.
އެ ޓްވީޓުގައި އައްޑޫގެ ތަރައްގީއަށް ހުރަސްއެޅުން ހުއްޓާލުމަށް ނިހާދު ވަނީ ގޮވާލައްވާފައެވެ.
“Thimaaveshi” fennanee #AdduCity bin hikkan veema thoa? Male’ sarahadhdhu Adhi Ehen hurihai rasheh hikkaa nimey iru bas nubunanee Eygein kon manafaa eh libeythee thoa? Addu tharaggee ah huras elhun huttaalumah govaalan! https://t.co/kjNjV3ANBq
— Feydhoo Meehaa (Mohamed Nihad) (@nihad_m) February 19, 2022
އައްޑޫގެ ތިމާވެއްޓަށް އިޔާދަނުކުރެވޭ ވަރުގެ ގެއްލުންތަކެއް ލިބިގެންދާނެ ކަމަށް ބުނެ، ބިން ހިއްކުމުގެ މަޝްރޫއު ހުއްޓާލުމަށް ޓްރާންސްޕޭރެންސީ މޯލްޑިވްސް ހިމެނޭހެން 7 ޖަމިއްޔާއަކުން ސަރުކާރަށް ގޮވާލައި ބަޔާނެއް ނެރެފައިވާ ދަނޑިވަޅެއްގައި ނިހާދު ވިދާޅުވީ އައްޑޫ ތަރައްގީކޮށް އިގުތިސާދީ ގޮތުން އެޅިފައިވާ މަރުތަޅަށް ހައްލެއް ހޯދައިދޭން އުޅުމުން އެކަންކަން ހުއްޓުވުމަށް ބަޔަކު މަސައްކަތްކުރަމުންދާ ކަމަށެވެ.
އައްޑޫގައި ބިން ހިއްކުމުގެ ބޮޑު މަޝްރޫއެއް ކުރިއަށް ގެންދަން ނިންމާފައިވަނީ އިންޑިއާގެ އެހީގައެވެ.
މި މަޝްރޫއާ ގުޅޭ އެންވަޔަރަމަންޓަލް އިމްޕެކްޓް އެސެސްމަންޓް (އީއައިއޭ) ރިޕޯޓު، ވޯޓަރ ސޮލިއުޝަންސް އިން ނިންމައި ރިޕޯޓު މިހާރު ވަނީ އެންވަޔަރަމަންޓަލް ޕްރޮޓެކްޝަން އޭޖެންސީ (އީޕީއޭ) އަށް ހުށަހަޅާފައެވެ.
އައްޑޫ ޑިވެލޮޕްމެންޓް ޕްރޮޖެކްޓްގެ ދަށުން 236.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.
