ރާއްޖޭގެ ރީތި ފޮޓޯއެއް ހިއްސާކޮށްލައިގެން ބ. މާޅޮހުގައި ޗުއްޓީއެއް ހޭދަކޮށްލުމުގެ ފުރުސަތު އުރީދޫއިން ހުޅުވާލައިފިއެވެ.
އުރީދޫއާއި އޯރްކާ މީޑިއާ ގްރޫޕް ގުޅިގެން ކުރިއަށް ގެންދާ “ވިޒިޓް މޯލްޑިވްސް ނައު” ކެމްޕޭނުގައި އުރީދޫއިން އަންނަނީ ކޮންމެ މަހަކު ވެސް ނަސީބުވެރި ފަރާތަކަށް ރާއްޖޭގެ އެކި ކަންކޮޅުތަކުގައި ހުރި ގެސްޓްހައުސް ތަކުގައި ޗުއްޓީ ހޭދަކޮށްލުމުގެ ފުރުސަތު ދެމުންނެވެ.
ކޮންމެ މަހަކު ވެސް ވަކި ތީމެއްގެ ދަށުން ކުރިއަށްދާ މި ކެމްޕޭނުގައި މިމަހަށް ކަނޑައަޅާފައިވާ ތީމަކީ ‘އެޑްވެންޗާ’ އެވެ، މި ފަހަރުގެ ފޮޓޯ ހުށަހެޅުމުގެ ސުންގަޑިއަކީ އަންނަ މަހުގެ 14ވަނަ ދުވަހެވެ.މި ޕްރޮމޯޝަންގައި ބައިވެރިވާ ފަރާތްތަކުން ފޮޓޯ ޕޯސްޓުކުރާއިރު ބޭނުންކުރަންޖެހޭ ހޭޝްޓެގަކީ VisitMaldivesNow# އެވެ.
މި ތީމަށް ފޮޓޯ ހުށަހަޅާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް މާޅޮހުގެ “ތުނޑި ވިލެޖް” ގެސްޓް ހައުސްގައި އިތުރު ފަރާތަކާއެކު ޗުއްޓީއެއް ހޭދަކުރުމުގެ ފުރުސަތު ލިބިގެންދާނެއެވެ.
“ވިޒިޓް މޯލްޑިވްސް ނައު” ގެ ނަމުގައި ކުރިއަށްދާ މި ކެމްޕެއިން އަކީ އުރީދޫ އޮޕަރޭޓްކުރާ 10 ގައުމެއްގެ 117 މިލިއަން އަށްވުރެ ގިނަ ކަސްޓަމަރުންނަށް އަމާޒުކޮށް ދިވެހިރާއްޖޭގެ ރީތިކަން ޕްރޮމޯޓުކުރާ ޑެސްޓިނޭޝަން ކެމްޕެއިންއެކެވެ.
