ގދ. ތިނަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީން ތިނަދޫގައި ހުންނަ ފެމިލީ އެންޑް ޗިލްޑްރަން ސަރވިސް ސެންޓަރު (އެފް.ސީ.އެސް.ސީ)ގެ އިސްވެރިންނާއެކު މަޝްވަރާ ބައްދަލުވުމެއް ބާއްވައިފިއެވެ.
މި ބައްދަލުވުމަކީ، ކުޑަކުދިންނަށް ކުރާ އަނިޔާ ހުއްޓުވުމުގެ ދުވަސް އަދި އަންހެނުންނަށް ކުރާ އަނިޔާ ހުއްޓުވުމުގެ ދުވަސް ކުރިއަށް އޮތުމުން އެކޮމިޓީން އިސްނަގައިގެން ބޭއްވުމަށް ހަމަޖެހިފައިވާ ހަރަކާތްތަކާއި ބެހޭގޮތުން މަޝްވަރާކުރުމަށް ބޭއްވުނު ބައްދަލުވުމެއް ކަމަށް ތިނަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާ ޖީޒާ ޙަސަން ވިދާޅުވިއެވެ.
އެ ހަރަކާތްތަކާއި ގުޅޭގޮތުން އިތުރަށް ވާހަކަދައްކަވަމުން ޖީޒާ ވިދާޅުވީ، ނޮވެމްބަރ 19 އިން ފެށިގެން 21 އާއި ހަމައަށް ހާއްސަ ޕްރޮގްރާމްތަކެއް ބޭއްވުމަށް ހަމަޖެހިފައިވާ ކަމަށާއި، އެގޮތުން މި ތިން ދުވަހުވެސް ހިންގާ ހަރަކާތްތައް އެ ދެދުވަސް އެއްކޮށް ފާހަގަކުރުމަށް ނިންމާފައިވާ ކަމަށެވެ.
