މާދަމާ ބާއްވަން ހަމަޖެހިފައިވާ ގދ. ތިނަދޫ ކައުންސިލްގެ 10 ވަނަ ރަސްމީ ބައްދަލުވުމަށް އެ ކައުންސިލްގެ މެމްބަރު މުޙައްމަދު ޒަލީފް އަބްދުالله ގެ ހުށަހެޅުންތައް ތާވަލް ކުރެވިފައިނުވާތީ އެކަމާ ޒަލީފް ކަންބޮޑުވުން ފާޅުކުރައްވައިފިއެވެ.
ތިނަދޫގެ ކައުންސިލަރެއް ކަމަށްވާ މުހައްމަދު ޒަލީފް ހުންނަވަނީ ތިނަދޫގެ މުނިސިޕަލް މަސައްކަތްތަކާ ބެހޭ ޔުނިޓާއި ހަވާލުވެގެންނެވެ. އެހެންކަމުން މުނިސިޕަލްޓީގެ 4 ކަންބޮޑުވުމެއް ޒަލީފްވަނީ ކައުންސިލް ބައްދަލުވުމުގައި ހުށަހަޅާފައެވެ. އެހެންނަމަވެސް 14 ޖުލައި 2021 ވާ ބުދަ ދުވަހު ބާއްވަން ހަމަޖެހިފައިވާ ތިނަދޫ ކައުންސިލުގެ 10 ވަނަ ރަސްމީ ބައްދަލުވުމުގައި ޒަލީފުގެ ހުށަހެޅުން ތާވަލްކުރެވިފައި ނެތުމުން ޒަލީފްވަނީ އެކަމާ ކަންބޮޑުވުން ފާޅުކޮށްފައެވެ.
“މީގެން އެއްވެސް ކަމެއް ރިޔާސަތުން ތާވަލް ނުކުރުމަކީ ރައްޔިތުންނަށް ޚިދުމަތްދޭން އެޅޭ ހުރަހެއްކަން ފާހަގަކުރަން. އަޅުގަނޑުގެ ފަރާތުން ހުށަހަޅާފައިވަނީ ރައްޔިތުންނާ ގުޅޭ މުހިއްމު ކަންކަން. ޖަލްސާއަށް ހުށަހަޅަން ޖެހޭ ކަންކަން ފޮނުވަން ޖެހެނީ ޖަލްސާ އޮންނަ ދުވަހުގެ 2 ދުވަސް ކުރިން. އަޅުގަނޑު އެކަން ކުރިން. އަޅުގަނޑުގެ އެއްވެސް ހުށަހެޅުމެއް ނެތް ޖަލްސާއަށް ތާވަލްކޮށްފަ,” ޒަލީފް މީޑިޔާއަށް މައުލޫމާތުދީފައިވެއެވެ.
މާދަމާ ބޭއްވުމަށް ހަމަޖެހިފައިވާ ކައުންސިލުގެ 10 ވަނަ ބައްދަލުވުމުގައި ހިމަނާލަން ޒަލީފް ހުށަހެޅި 4 ހުށަހެޅުމަކީ:
މިކަމާ ބެހޭގޮތުން ތިނަދޫ ކައުންސިލުގެ ރައީސް ސައުދު އަލީ ވިދާޅުވީ ކައުންސިލްގެ ބައްދަލުވުންތަކަށް ހުށަހަޅާ ކަންކަމުގެ ތެރެއިން ތާވަލްކުރަނީ އެ ކަމެއްގެ ކުޑަބޮޑު މިނަށް ބަލައިގެން ކަމަށާއި އެކަންކަން ތާވަލްކުރަނީ ރައްޔިތުންނާ ގުޅުން ހުންނަ މިންވަރަށް ބަލައިގެން ކަމަށެވެ. އަދި އެފަދަ ބޮޑެތި ކަންކަމުގައި ހުރިހާ ކައުންސިލް މެމްބަރުންގެ މަޝްވަރާއަށްފަހުގައި ނޫނީ ބައްދަލުވުންތަކަށް އެފަދަ ކަންކަން ތާވަލް ނުކުރާ ކަމަށް ސައުދު ވިދާޅުވިއެވެ.
