ޔުނިވާސަލް އެންޓަޕްރައިޒަސް ޕްރައިވެޓް ލިމިޓެޑުން، ހެލްތު މިނިސްޓްރީ އަށް އިތުރު 10،000 ޓެސްޓް ކިޓް ހަދިޔާކޮށްފި އެވެ.
އެކަން ހާމަކޮށް ހެލްތު މިނިސްޓްރީން މިއަދު ކުރި ޓްވީޓެއްގައި ބުނެފައި ވަނީ މިއަދު ހަދިޔާކުރި ޓެސްޓް ކިޓްތަކާއެކު، ޔުނިވާސަލް އިން މި ޕެންޑަމިކްގައި މިހާތަނަށް 30،000 އަށްވުރެ ގިނަ ޓެސްޓް ކިޓް ހަދިޔާކޮށްފައިވާ ކަމަށެވެ.
Ministry of Health received additional 10,000 #COVID19 test kits from Universal Enterprises Pvt Ltd today. With the kits contributed today, Universal has contributed over 30,000 during the course of this #pandemic pic.twitter.com/isQbZKhfjH
— Ministry of Health (@MoHmv) September 5, 2020
އެގޮތުން މިދިޔަ ޖޫން މަހުގެ ތެރޭގައިވެސް އެ ކުންފުނިން ވަނީ 20،200 ޓެސްޓް ކިޓް ހަދިޔާކޮށްފައެވެ. އަދި ޔުނިވާސަލް އިން ވަނީ މީގެ ކުރިން ކޮވިޑް-19 އަށް ޓެސްޓް ކުރާ ޕީސީއާރު ދެ މެޝިނާއި، ޕީޕީއީގެ އިތުރުން ވެންޓިލޭޓަރުވެސް ހަދިޔާކޮށްފައެވެ.
ރާއްޖެއިން މިހާތަނަށް 8،486 މީހުން ކޮވިޑް-19 އަށް ޕޮޒިޓިވްވެފައިވާއިރު، 5،822 މީހުން ވަނީ ބަލިން ރަނގަޅުވެފައެވެ. އަދި މިވަގުތު 2،629 މީހުން މި ބައްޔަށް ފަރުވާ ހޯދަމުންދާއިރު، ހޮސްޕިޓަލްތަކުގައި ފަރުވާ ހޯދަމުންދަނީ 168 މީހެކެވެ.
މީގެ އިތުރުން ކޮވިޑް-19 އާ ގުޅިގެން މިހާތަނަށް 119،460 ސާމްޕަލް ނަގާފައިވާއިރު، 29 މީހަކު ވަނީ މި ބަލީގައި ރާއްޖެއިން މަރުވެފައެވެ.
