މަޝްހޫރު ދީނީ ޢިލްމުވެރިޔާ، ޑރ. ބިލާލް ފިލިޕްސް އަންނަ މާޗު މަހުގެ ތެރޭގައި ރާއްޖެ ވަޑައިގަންނަވާނެ ކަމަށް ޔޫތު މިނިސްޓަރ އަޙްމަދު މަހުލޫފް ވިދާޅުވެއްޖެ އެވެ.
މިނިސްޓަރ މަހުލޫފް މިއަދު ކުރެއްވި ޓްވީޓެއްގައި ވިދާޅުވެފައި ވަނީ ރާއްޖޭގެ ޒުވާނުންގެ މެދުގައި އަމާންކަމާއި ސުލްޙަމަސްލަސްކަން ޕްރޮމޯޓްކުރުމަށްޓަކައި ރާއްޖެ ވަޑައިގަތުމަށް ދެއްވި ދަޢުވަތު ޤަބޫލުކުރެއްވި ކަމަށްޓަކައި ޑރ. ބިލާލް އަށް ޝުކުރު ދަންނަވާ ކަމަށެވެ.
މަހުލޫފް ވިދާޅުވީ އަންނަ މާޗު މަހުގެ 12 އިން 18 އަށް ޑރ. ބިލާލް ރާއްޖޭގައި ހުންނަވާނެ ކަމަށެވެ.
Thank respected Sheikh @DrBilalPhilips for accepting the invitation to visit Maldives to promote Tolerance, Peace & Harmony to the youth of Maldives.
In Sha Allah he will be in Maldives from 12th – 18th March. pic.twitter.com/FpIDNFAQ5R
— Ahmed Mahloof (@AhmedMahloof) February 18, 2020
ރާއްޖޭގައި ދީނީ ޙަރަކާތްތައް ހިންގާ ޕީސް ފައުންޑޭޝަންގެ ދަޢުވަތަކަށް 2017 ވަނަ އަހަރުވެސް ޑރ. ބިލާލް ރާއްޖެ ވަޑައިގެންފައިވާއިރު، އޭގެ ކުރިންވެސް އެތައް ފަހަރެއްގެ މަތިން ޑރ. ބިލާލް ވަނީ ރާއްޖެއަށް ޒިޔާރަތް ކުރައްވައިފަ އެވެ.
ޑރ ބިލާލް ފިލިޕްސް އަކީ 1972 ވަނަ އަހަރު އިސްލާމް ދީނު ޤަބޫލު ކުރެއްވުމަށްފަހު އިސްލާމީ ތައުލީމުން އެންމެ މަތީ ފާސް ނަންގަވާފައިވާ އިލްމުވެރިއެކެވެ. ދީނީ އެކި އެކި މައުޟޫތަކައް 50 އަށްވުރެ ގިނަ ފޮތް ވަނީ ލިޔުއްވާފައެވެ. އަދި މިހާރުވެސް އިސްލާމް ދީނަށް މީހުން ހޭލުންތެރިކުރުމުގެ ގޮތުން ޕީސްޓީވީ، އިސްލާމިކް ޗެނަލް، ހުދާ ޓީވީ ފަދަ ޗެނަލްތަކުގައި އަންނަނަނީ ދަރުސް ދެއްވަމުންނެވެ.
