އަންނަ ސެޕްޓެމްބަރު މަހުގެ ތެރޭގައި މާސްޓަރޝެފް މޯލްޑިވްސް ފެށުމަށް ހަމަޖެހިފައިވާއިރު، އޭގެ ކުރިން ޝޯގެ ފުރަތަމަ ސީޒަންގެ އޮޑިޝަންތައް ފަށައި، ޝޯ އިންސާފުކުރާނެ ފަނޑިޔާރުންވެސް އިއުލާންކުރާނެ އެވެ.
ދުނިޔޭގެ ކެއްކުމުގެ އެންމެ ބޮޑު ފްރެންޗައިޒް ކަމަށްވާ “މާސްޓަރޝެފް”، ޕަބްލިކް ސަރވިސް މީޑިއާ (ޕީއެސްއެމް) އިން ރާއްޖެއަށް ތަޢާރަފްކޮށްފި އެވެ.
ރޭ އެކަމަށްޓަކައި ބޭއްވި ޚާއްސަ ރަސްމިއްޔާތެއްގައި “މާސްޓަރޝެފް މޯލްޑިވްސް” ތަޢާރަފްކޮށްދެއްވީ ޕީއެސްއެމްގެ މެނޭޖިންގ ޑިރެކްޓަރ، އަލީ ޚާލިދު އެވެ.
އެ ރަސްމިއްޔާތުގައި ވާހަކަފުޅުދައްކަވަމުން އަލީ ޚާލިދު ވިދާޅުވީ، މީރު ރަހައާއި ކުޅަދާނަ ކެއްކުންތެރިކަމަކީ ދިވެހީންގެ ލެޔާއި ގުޅިފައިވާ ކަމެއް ކަމަށާއި، މި ޝޯވ އަކީ ކެއްކުމުގެ ދާއިރާއިން ކުރިއަށްދާން ބޭނުންވާ ދިވެހިންނަށް ބައިނަލްއަޤްވާމީ ފަންތީގައި ވާދަކޮށް، ބެލުންތެރިންނާއި މުޅި ދުނިޔެއަށް މި ފަންނުގައި ދިވެހީންގެ ހުނަރާއި ޤާބިލްކަން ސާބިތުކޮށްދިނުމަށް ލިބޭ ރަނުގެ ފުރުސަތެއް ކަމަށެވެ.
ރޭ ޓީވީއެމްގައި އޮތް ރަސްމިއްޔާތުގައި މާސްޓަރޝެފް ޕްރޮޑިއުސްކުރާ އެންޑްމޯލް ޝައިން ގްރޫޕްގެ އޭޝިއާ ސަރަޙައްދުގެ އެގްޒެކެޓިވް ޑިރެކްޓަރ، ރަޝްމީ ބާޖްޕާއިވެސް ބައިވެރިވެވަޑައިގެންނެވި އެވެ.
ރޭގެ ރަސްމިއްޔާތުގައި މާސްޓަރޝެފް މޯލްޑިވްސްގެ ސްޕޮންސަރުންނާއެނު އެއްބަސްވުމުގައި ވަނީ ސޮއިކޮށްފަ އެވެ. އެގޮތުން ޝޯގެ ޓައިޓަލް ސްޕޮންސަރގެ ގޮތުގައި ރާއްޖޭގައި މުއާސަލާތީ ޚިދުމަތްދޭ އެއް ކުންފުނި ކަމަށްވާ ދިރާގު ވަނީ ހަމަޖައްސައިފަ އެވެ.
މީގެ އިތުރުން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އާއި ވިލާ ކޮލެޖުގެ އިތުރުން ބޭންކް އޮފް މޯލްޑިވްސް (ބީއެމްއެލް)ވެސް ވަނީ މާސްޓަރޝެފް މޯލްޑިވްސްގެ ސްޕޮންސަރުންގެ ގޮތުގައި ހަމަޖައްސައިފަ އެވެ.
އަންނަ ސެޕްޓެމްބަރު މަހުގެ ތެރޭގައި މާސްޓަރޝެފް މޯލްޑިވްސް ފެށުމަށް ހަމަޖެހިފައިވާއިރު، އޭގެ ކުރިން ޝޯގެ ފުރަތަމަ ސީޒަންގެ އޮޑިޝަންތައް ފަށައި، ޝޯ އިންސާފުކުރާނެ ފަނޑިޔާރުންވެސް އިއުލާންކުރާނެ އެވެ.
