ކުޑައިރުއްސުރެ ނަމާދަށް އަހުލުވެރި ކުރުވުމަކީ ވަރަށް މުހިންމު ކަމެކެވެ. މީގެ ސަބަބުން ވަކި އުމުރަކަށް ދިއުމުން ނޫނީ އޭގެ ކުރީގައިވެސް އިސްލާމްދީން ދެކެ ދަރީންގެ ހިތުގައި ލޯބި އުފެދި ނަމާދަށް ފަރުވާތެރިވާނެއެވެ. ނަމާދަކީ ފާފަތަކާއި މުންކަރާތްތަކުން ދުރުކޮށްދޭ އަޅުކަމެކެވެ.
ބެންގަލޫރުގެ މިސްކިތެއްގައި މިވަނީ ކުޑަކުދީން ނަމާދަށް އަހުލުވެރިކުރުވުމަށް ވަރަށް މޮޅު އުކުޅެއް ބޭނުންކޮށްފައެވެ. އެގޮތުން ޖެހިޖެހިގެން 40 ފަތިސްނަމާދު ކުރުމުން ކޮންމެ ކުއްޖަކަށް ބެންގަލޫރުގެ ހާޖީ ސާރ އިސްމާއީލް ސައިތް މިސްކިތުން މިވަނީ ބައިސްކަލެއް ހަދިޔާ ކޮށްފައެވެ.
މިދިޔަ މަހުގައި މިކަމުގެ މައުލޫމާތު 99 ކުޑަކުދީންނަށް ދިނުމުން 13 ކުއްޖަކު ވަނީ ޖެހިޖެހިގެން 35 ފަތިސްނަމާދަށް ފަރުވާތެރިވެ ނަމާދު ކޮށްފައެވެ. މިސްކިތުން މި ކުދީންނަށް ބައިސްކަލު ހަދިޔާކޮށްފައިވާއިރު ބާކީ ތިބި ކުދިންނަށް ހަދިޔާ ކޮށްފައި ވަނީ އަތުގައި އަޅާ ގަޑިއެވެ.
މިސްކިތުން ބުނީ އެ މުޖްތަމަޢުއަށް ނަމާދަށް ކުދީން އަހުލުވެރިކުރުވުމަށް ބާރުއެޅުވިއްޖެ ކަމަށާއި މި އިސްނެގުމުގެ ސަބަބުން އެހެން މިސްކިތް ތަކުން ވެސް މިކަހަލަ ކަންކަން ކުރަން ފަށާފައިވާ ކަމަށެވެ.
މި މިސްކިތަށް މިހާރު 200 އެއްހާ ކުދިން ފަތިސްނަމާދަށް ގަވާއިދުން އަންނާނެ ކަމަށް ބުނެފައިވާއިރު މި ކުދީންނަށް މިސްކިތުން ދޭން ނިންމާފައި ވަނީ ކުޅިވަރުކުޅޭ ސާމާނެވެ.
