ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ފާޑު ކިޔަން ޖެހެނީ އެމަނިކުފާނު އިސްލާމް ދީނާއި ބީރަށްޓެހި ވާހަކަ ދައްކަވާތީ ކަމަށް ސަރުކާރު ކޯލިޝަންގެ އެއް ޕާޓީ ޖުމްހޫރީ ޕާޓީ އިން ބުނެފި އެވެ.
ޖުމްހޫރީ ޕާޓީން މިގޮތަށް ބުނެފައި ވަނީ އެ ޕާޓީ ގެ ފޭސްބުކް މެދުވެރިކޮށް ލިޔެފައިވާ ކިޔުމެއްގައި އެވެ. ޖޭޕީން ބުނީ އެ ޕާޓީން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ގެ ސަރުކާރަށް ފާޑުކިޔާފައި ނުވާނޭ ކަމަށާއި ނަމަވެސް ކުރީގެ ރައީސް މުހައްމަދު ނަޝީދަށް ބައެއް ފަހަރު ފާޑުކިޔާ ކަމަށެވެ.
ޖޭޕީން މިގޮތަށް ބުނެ ފޭސްބުކްގައި ލިޔުމެއް ޕޯސްޓް ކޮށްފައިވާއިރު އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް އިއްޔެ ވިދާޅުވީ ޖޭޕީން ސަރުކާރަށް ފާޑުކިޔާނަމަ ކޯލިޝަނުން ނިކުންނަން ޖެހޭނެ ކަމަށެވެ. އާޒިމް މިގޮތަށް ބުނެފައި ވާއިރު ޖޭޕީއަކީ ރާއްޖޭގައި މިހާރު އެންމެ ކުރިއަރަމުން އަންނަ އެއް ޕާޓީއެވެ. ޖުމްހޫރީ ޕާޓީއާއި ކޮންމެ ހަފްތާއަކު އެތައް ބަޔަކު ގުޅެމުން ދެއެވެ.
