ދިވެހިރާއްޖޭގެ އިޤްތިޞާދު ދަށަށް ގޮސްފައިވާ ކަމަށާއި އެކަން އެގޮތަށް ވީ ދިވެހި ރައްޔިތުންގެ ފައިސާ ނަހަމަ ގޮތުގައި ބޭނުންކުރާތީ ކަމަށް ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަހުމަދު ސިޔާމް މުހައްމަދު ވިދާޅުވެއްޖެއެވެ.
ސިޔާމް މިގޮތަށް ވިދާޅުވެފައިވަނީ މިއަދު ރައްޔިތުންގެ މަޖިލީހުގެ ޖަލްސާގައި އިންކަމް ޓެކްސް ނެގުމާ ގުޅޭ ގޮތުން ކުރިއަށް ދިޔަ ބަހުސްގައި ފިނޭންސް މިނިސްޓްރީގެ ހިސާބުތަކަށް އަލިއަޅުވާލައްވައި ވާހަކަފުޅު ދައްކަވަމުންނެވެ. ސިޔާމް ވިދާޅުވީ ކޮންމެ ސަރުކާރަކުން އައިސް ވެސް ރައްޔިތުންނަށް ދަޅަ ދައްކައި ޓެކްސް ފައިސާ ކެއުމަކީ ރައްޔިތުން ވަރަށް ރުޅިގަދަވާ ކަމެއް ކަމަށެވެ.
މަޝްހޫރު ވިޔަފާރިވެރިޔާ ސިޔާމް ވިދާޅުވީ ވިޔަފާރިވެރިން ގަދައަޅައި މަސައްކަތްކޮށް ޓެކްސް ދައްކަނީ ރައްޔިތުންގެ އާމްދަނީއާއި އާންމު ދިރިއުޅުން ތައްރަޤީކުރަން ކަމަށެވެ. އަދި އެބޭފުޅުންގެ ތައުލީމާ ސިއްޙަތަށް ކަންތައްތައް ރަނގަޅުކުރަން ކަމަށެވެ. އެހެންނަމަވެސް ކޮންމެ މީހަކު ވެރިކަމަށް އައިސް މުޅި ޤައުމު އަމިއްލަ މުދަލަށް ހަދައި ބޭނުންމީހަކަށް ބޭނުންގޮތަކަށް ބަދަލުދެމުން ދާކަން ސިޔާމް ފަހަގަކުރެއްވިއެވެ.
މިއަދުގެ ޖަލްސާގައި މެމްބަރު ސިޔާމް ވަނީ ރައްޔިތުން ސަރުކާރަށް ދައްކާ ޓެކްސް ފައިސާ ދަނީ ކޮންތާކަށް ތޯ ބުނެދެއްވުމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގެ އަރިހުން އެދިވަޑައިގެންފައެވެ.
