ފުލުހުންނާއި ހަވާލާދީ “އަވަސް” ނޫހުން ރިޕޯޓުކުރާ ގޮތުގައި މީހުނަށް މަރުގެ އިންޒާރު ދީ މުޖުތަމަޢުގައި ބިރުވެރިކަން އުފެދޭ ގޮތަށް މީސްމީޑިޔާގައި އަނިޔާވެރި ކަމަށް ހިތްވަރު ދެމުންދިޔަ މައްސަލައެއްގައި މީހަކު ހައްޔަރު ކޮށްފައިވާ ކަމަށެވެ. މި މައްސަލައާއި ގުޅިގެން ހައްޔަރުކޮށްފައި ވަނީ އުމުރުން 19 އަހަރުގެ ދިވެހި ފިރިހެނަކު ކަމަށާއި، އޭނާ ހައްޔަރުކޮށްފައި ވަނީ ފުވައްމުލަކު ސިޓީ އިން ކަމަށް ފުލުހުން ބުނެއެވެ.
ނަމަވެސް އޭނާއާއި ގުޅޭ އިތުރު އެއްވެސް ތަފްސީލެއް ފުލުހުން އަދި ހާމައެއް ނުކުރެއެވެ.
ފުލުހުން ދަނީ މިހާރު މިމައްސަލަ އިތުރަށް ތަޙުޤީޤުކުރަމުންދާއިރު، އެމްޑީއެންގެ މަސްއޫލުވެރިޔާ ޝަހިންދާ އިސްމާއީލަށް މަރުގެ އިންޒާރު ދިން ކަމަށް ބުނެ ފުވައްމުލަކު ޒުވާނެއް ކަމުގައިވާ އަލީ ރަވާއު ހައްޔަރުކޮށްފައިވާ ކަމަށާއި، އޭނާ މިހާރުން މިހާރަށް ދޫކޮށްލުމަށް ގިނަ ބަޔަކު ދަނީ މީސްމީޑިޔާގައި ގޮވާލަމުންނެވެ. ނަމަވެސް، ފުލުހުން މިއަދު ހައްޔަރުކުރި ޒުވާނާ އަކީ ރަވާއު ކަމެއް އަދި ސާފެއް ނުވެއެވެ.
