މޫސުން ގޯސްވެ ދެކުނުގެ ބޮޑު ބަޔަކަށް މޫސުމާއިބެހޭ ޤައުމީ އިދާރާއިން ހުދު ސަމާލު ނެރެފި އެވެ. އެ އިދާރާއިން ހުދު ސަމާލު ނެރެފައި ވަނީ ވ. އަތޮޅުން އައްޑޫސިޓީ އާއި ހަމަޔަށެވެ.
ހުދު ސަމާލު މި ސަރަހައްދަށް ނެރެފައި ވަނީ މިރޭ މޫސުމާއި ބެހޭ ޤައުމީ އިދާރާ އިން ބުނީ 1800 އާއި ހަމަޔަށެވެ. އެ އިދާރާއިން ބުނީ މި ވަގުތާއި ހަމަޔަށް މި ސަރަހައްދުތަކަށް މޫސުން ގޯސްވެ ގުގުރުމާއެކު ވިއްސާރަ ކުރާނޭ ކަމަށެވެެ. އަދި މެދުތެރެއާއި އުތުރުގެ އަތޮޅުތަކަށް ކެރީގެ އަސަރު ފޯރާނެ ކަމަށް އެ އިދާރާއިން ބުނެ އެވެ.
ވައިޖެހޭނެ ގޮތަށް ބަލާއިރު ދެކުނުގެ އަތޮޅުތަކަށް އިރުދެކުނުން ދެކުނުން، އެހެން ހިސާބުތަކަށް ހުޅަނގާއި ހުޅަނގުދެކުނުން، ހުރިހައި ހިސާބަކަށްވެސް ގަޑިއަކު 10 މޭލާއި 20 މޭލާ ދެމެދުގެ ބާރު މިނުގައި ވައި ޖެހޭނެ އެވެ. އަދި ވިލާގަނޑުގައި ގަޑިއަކު ގާތްގަނޑަކަށް 35 މޭލު ބާރުމިނަށް ވައިގަދަވުމަކީ އެކަށީގެންވާ ކަމެއް ކަމަށް މޫސުމާއި ބެހޭ އިދާރާއިން ބުނެއެވެ.
މެޓް އޮފީހުން ބުނީ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށާއި ރާޅުގެ އުސްމިން ގާތްގަނޑަކަށް 3-5 ފޫޓު ހުންނާނެ ކަމަށެވެ.
