ހައި ކޯޓުގެ ފަނޑިޔާރު ކަމަށް ކުރިމަތިލުމަށް ހުޅުވާލި މުއްދަތުގެ ތެރޭގައި އެމަޤާމަށް 12 ބޭފުޅަކު ކުރިމަތިލައްވައިފި ކަމަށް ޖުޑިޝަލް ސަރވިސް ކޮމިޝަން (ޖޭއެސްސީ) އިން ބުނެފި އެވެ.
ޖޭއެސްސީގެ އޮފިޝަލަކާއި ހަވާލާދީ “ސީއެންއެމް” އިން ރިޕޯޓްކުރާ ގޮތުގައި ހައިކޯ ޓުގެ ފަނޑިޔާރު ކަމުގެ މަޤމަށް 12 ބޭފުޅަކު ވަނީ ކުރިމަތިލައްވައިފަ އެވެ. އެހެންނަމަވެސް އެމަޤާމަށް ކުރިމަތިލެއްވި ބޭފުޅުންގެ ނަމާއި އަދި މިކަމާ ގުޅޭ އިތުރު އެއްވެސް ތަފްސީލެއް ޖޭއެސްސީ އިން ހާމައެއް ނުކުރެއެވެ.
އެނގިފައިވާ ގޮތުގައި ދަށު ކޯޓުތަކުގެ ބައެއް ފަނޑިޔާރުން ވެސް އެ ދެ މަގާމަށް ކުރިމަތިލެއްވި އެވެ.
ހައި ކޯޓުގެ ފަނޑިޔާރު ކަމަށް ކުރިމަތިލުމަށް ހުޅުވާލާފައި ވަނީ މިމަހުގެ 15 އިން 21 އަށެވެ. އެމަޤާމަށް ކުރިމަތިލުމުގެ ފުރުސަތު ހުޅުވާލީ ހައި ކޯޓުގެ ފަނޑިޔާރުންގެ ބެންޗު 11 އަށް އިތުރު ކުރަން ކޯޓުތަކުގެ ޤާނޫނަށް ކުރިން ގެނެސްފައިވާ އިސްލާހާ އެކު، އެ ކޯޓުގެ ބެންޗުން ދެ މަޤާމެއް ހުސްކޮށް އޮތުމުންނެވެ.
ހައި ކޯޓުގެ ފަނޑިޔާރަކަށް މުސާރަ އާއި އިނާޔަތްތަކާ އެކު މަހަކު 54،300 ރުފިޔާ ލިބިވަޑައިގަންނަވާނެ އެވެ. އެއީ އަސާސީ މުސާރައިގެ ގޮތުގައި 36،000ރ. އާއި ލިވިންގއެލަވަންސްގެ ގޮތުގައި ދޭ 15،000ރ. ގެ އިތުރުން ރިސްކް އެލަވަންސްގެ ގޮތުގައި ލިބޭ 3،300ރ. އެވެ. މީގެ އިތުރުން ރައްޔިތުންގެ މަޖިލީހުން ކަނޑައަޅާ ގޮތެއްގެ މަތިން މެޑިކަލް އިންޝުއަރެންސާއި ފޯނު އެލަވަންސް ވެސް ލިބިގެންދާނެ އެވެ.
