ޕިކަޕެއްގައި ކަފު ޖަހައިގެން މާލޭގެ މަގެއްގެ މަތިިން ގެންދިޔަ ކޮންކްރީޓް ޕަމްޕް މެޝިނެއްގެ ފުރޮޅުން ޖެހި މީހެއްގެ ފައި ވަރަށްބޮޑަށް ޒަހަމްވެއްޖެ އެވެ.
ރޭ މެންދަމުން އަލިވެ، އެކެއް ޖަހާ އެހާކަށް ހާއިރު އިސްކަންދަރު މަގުގައި ހިނގި އެ ހާދިސާގައި ކޮންކްރީޓް ޕަމްޕުގެ ފުރޮޅު ދަށުވީ އެ މަގުގައި ޕާކްކޮށްފައި ހުރި ސައިކަލްތަކެއްގެ ކައިރިން ހިނގާފައި ދިޔަ މީހަކަށް ކަމަށް ފުލުހުންވަނީ ބުނެފައެވެ. ފުލުހުން ބުނީ އެ ހަދިސާ ހިނގިއިރު ޕިކަޕް ދުއްވަން އިނީ ބިދޭސީއެއްކަމަށާއި މިހާރު އެ މައްސަލަ ތަހުޤީޤުކުރަމުން އަންނަކަމަށެވެ.
މި ހާދިސާގައި ޒަހަމްވި އުމުރުން 41 އަހަރުގެ މީހަކަށް ފަރުވާދެމުން އަންނަ ކަމަށާއި އޭނާގެ ފަޔަށް ގެއްލުން ލިބިފައިވާ ކަމަށް އައިޖީއެމްއެޗް އިން ބުނެފައިވާއިރު އެމީހާއަށް ލިބުނު އަނިޔާގެ ތަފުސީލެއް އެ ހޮސްޕިޓަލަކުން އަދި ހާމަކޮށްފައެއް ނުވެއެވެ
