އުސޫލުގެ ތެރެއިން ކަންކުރިނަމަ އެއްވެސް ގައިދީއަކަށް ވެސް އެއްވެސް އޮފިސަރަކަށް ވެސް އަނިޔާ ނުލިބޭނެކަމަށް ކޮމިޝަނަރ އޮފް ޕްރިޒަންސް އަބްދުﷲ މުނާޒް ވިދާޅުވެއްޖެއެވެ.
ހޮނިހިރު ދުވަހު ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމިޓީ އަދި ހިއުމަން ރައިޓްސް އެންޑް ޖެންޑަރ ކޮމިޓީއަށް ކޮމިޝަނަރ އޮފް ޕްރިޒަންސް ހާޒިރުކޮށްގެން ބޭއްވި ބައްދަލުވުމުގައި މުނާޒް ވިދާޅުވީ މައްސަލައަކީ ޤަވައިދުތައް ހެދިފައިވީނަމަވެސް އެ ޤަވައިދުތަކަށް އަމަލުނުކުރުން ކަމަށެވެ. އަދި ކޮމިޝަނަރ އޮފް ޕްރިޒަންސް ގެ މަގާމައި ހަވާލުވި ފަހުން ޤަވައިދަށް ބޮޑެތި ބަދަލުތަކެއް ގެނެސްފައިވާނެކަމަށެވެ.
މީގެ އިތުރުން މުނާޒް ވިދާޅުވީ އޮފިސަރުންނާއި ގައިދީންނާއި ދެމެދު ހިނގި ހަމަނުޖެހުމުގައި، ހާލަތު ގޯސްވާން މެދުވެރިވީ ޖަލު ބަލަހައްޓަން ތިބި އޮފިސަރުން ކަންތައް ކުރެއްވި ގޮތުން ކަމަށެވެ. އަދި މި މައްސަލައިގައި ހާލަތާ ނުބައްދަލު ބާރު ބޭނުންކޮށްފައިވާ ކަން ގަބޫލުކުރައްވާ ކަމަށާއި، އެ މީހުންނާ ދެކޮޅަށް މައްސަލައިގެ ފުރިހަމަ ތަހުގީގެއް ހިންގުމަށް ފަހު ފިޔަވަޅު އަޅުއްވާނެ ކަމަށް މުނާޒް ވިދާޅުވިއެވެ.
މިދިޔަ ބުރާސްފަތި ދުވަހު މާފުށީ ޖަލުގައި ހަމަނުޖެހުން ހިނގީ، ގޮޅިއަށް ވެއްދުން މަނާ އެއްޗެއް ގެނެސްދިނުމަށް ގައިދީއަކު އެދުމުން އެކަމަށް ޖަލު އޮފިސަރު ދެކޮޅު ހެދުމުންނެވެ.
