ހަޔާތުގެ ބައިވެރިޔާ އަކީ ދިރިއުޅުމުގެ އެއްބައެވެ. ކައިވެނި ކުރުމަށްފަހު އެކުގައި ދެމީހުން އުޅޭއިރު އުފަލާއި ހިތްހަމަ ޖެހިގެން އުޅުމަކީ ކޮންމެ މީހަކުވެސް ދެކޭނެ ހުވަފެނެކެވެ.
ގިނަ ޒުވާނުން ހަޔާތުގެ ބައިވެރިން ހޯދައި ކައިވެނި ކުރާއިރު އެއްބަޔަކު ހުސްހަށިބައިކޮށް ތިބޭތީ ފެނެއެވެ. އުމުރުގެ ބޮޑުބައި އެގޮތުގައި ހޭދަ ކުރަނީވެސް މަދު ބައެއް ނޫނެވެ. އެކުގައި އުޅޭ އެންމެން ކައިވެނިކޮށް އަމިއްލަ ދިރިއުޅުމެއް ފަށާއިރުވެސް އެކަމަށް ފަރުވާލެއް ނުބަހައްޓާ ތިބޭތަން ފެނެއެވެ. މިފެންނަ ފެނުމަށް ބަލާފައި އެފަދަ މީހުންގެ ހިޔާލުގައި މިފަދަ ކަމެއްގެ ވިސްނުން ނެތީބާއޭ ވެސް ބައެއް ފަހަރު ހިތަށް އަރައެވެ.
ހަޤީގަތަށް ބަލާލަން ހިނގާށެވެ. އިންސާނަކަށް ވީތީ ކޮންމެ މީހަކީ ވެސް ހެޔޮލަފާ ދިރިއުޅުމެއް އުޅެން ބޭނުންވާނެ މީހެކެވެ. އެކުގައި އުޅޭނެ، ހަޔާތުގެ ބައިވެރިއަކު ބޭނުންވާނެ މީހެކެވެ. ލޯބި ލޯބި އާއިލާއެއް ބޭނުންވާނެ މީހެކެވެ. މިކަންތަށް ބޭނުން ނުވާނެ އެކަކުވެސް ނުހުންނާނެއެވެ. ނަމަވެސް އެންމެންނަށް އެއްވަރަކަށް މިކަންތައްތައް ނުލިބިދާނެއެވެ.
‘ މެރީ ކުރަނީ ކޮން އިރަކު؟’ މިހެން އަހާލުމުން އެއްބަޔަކު ވަރަށް ރުޅިއަންނަތަން ފެނެއެވެ. އަދި ހިތްހަމަ ނުޖެހޭ ތަން ވެސް އާދެއެވެ. ސަބަބުތަކެއް ނެތިއެއް ނޫނެވެ. އެހެނީ ކައިވެނި ނުކޮށް އެމީހަކު ހުންނަނީ ކުރާހިތް ނުވާތީ އެއް ނޫނެވެ. އިންނާނެ މީހަކު ވެސް ނުވާތީ އެއް ނޫނެވެ. ހިތްހަމަޖެހޭ، ހިތް ކިޔާ މީހުން ނެތިގެނެއް ވެސް ނޫނެވެ. އަދި ތަނަވަސް ކަން ނެތިގެނެއްވެސް ނޫނެވެ. އެފަދަ ގިނަ މީހުންނަށް ދިރުއުޅުން ނުފެށިފައި ތިބީ އެހެން މީހުންގެ ނުފޫޒާ ހެދިއެވެ.
މައިންބަފައިންގެ ނުފޫޒަކީ އެންމެ ގިނަ މީހުން ހަޔާތުގެ ބައިވެރިޔަކު އިޙްތިޔާރުކުރުމުގައި ކުރިމަތިލާ ހިތްދަތިކަމެވެ. މައިންބަފައިން އެއްވެސް ހާލެއްގައި ދަރިންނަށް ދެރައަކަށް ނޭދޭނެތީވެ، މިކަމުގައިވެސް އެވެރިން ވިސްނާ މިންވަރުގެ ސަބަބުންނެވެ. ނަމަވެސް ބައެއް ހާލަތްތަކުގައި މިކަން ދަރިންނަށް އުނދަގުލަކަށްވެ ދިރިއުޅުން މަތިން ފޫހިވާތަން އާދެއެވެ. މީގެ ސަބަބުން ހަޔާތުގެ ބައިވެރިޔާ އިޙްތިޔާރު ކުރުމުގައި ވިސްނަން ނުޖެހޭ އެތައްކަމަކާއި ވިސްނަން ޖެހި އެއީ ކުރިމަތިލާ މުސީބާތަކަށް ވެފައިވެއެވެ.
އިޙްތިޔާރު ކުރާ ބައިވެރިޔާ އަކީ ވަކި ސަނަދެއް އޮންނަން ޖެހޭ، ވަކި ކަހަލަ ނަސަބަކުން އައިސްފައިވާ ނުވަތަ ވަކި ރަށަކަށް ނިސްބަތްވާ އަދި ތަނަވަސް މީހަކަށް ވާން ޖެހޭކަމަށް ޝަރުތު ކުރުމަކީ އެފަދަ މީހަކު ހޯދުމަށް އޮތް ބުރައަކަށް ވެއެވެ. ހާއްސަކޮށް ތަނަވަސް އާއިލާތަކުގެ ކުދިން ބައިވެރިޔާ ހޯދުމުގައި މިކަހަލަ ކަންކަމަށް ބަލަން ޖެހެއެވެ. ސަބަބަކީ އާއިލާ މީހުންގެ ނުފޫޒު ނުވަތަ މައިންބަފައިންގެ ނުފޫޒާއި ހެދިވެސްމެވެ. ނަތީޖާއަކީ އެކުދިންގެ އުމުރު ދެބައިވެގެން ދާއިރުވެސް މައިންބަފައިން އެދޭފަދަ ބައިވެރިއަކު ނުލިބުމެވެ. އަދި އެފަދަ ޝަރުތު ފުރިހަމަވާ ބައިވެރިއެއް ލިބުނަސް ކައިވެއްޏާއި ހަމައަށް ނުދެވެނީސް ދެމީހުން އެކުގައި ނޫޅެވޭނެކަން ކަށަވަރުވެއެވެ. އެހެން ނޫނީ ކައިވެންޏަށް މަދުދުވަސްތަކެއް ނުވަނީސް ވަރިއާއި ހަމައަށް ދެއެވެ.
ހަޔާތުގެ ބައިވެރިއަކު ހޯދައި ކައިވެންޏަކާއި ހަމައަށް ދިޔުމަކީ ކޮންމެ މީހެއްގެ އަމިއްލަ އިޙްތިޔާރަށް ދޫކުރެވިފައި އޮންނަކަމަކަށް ވާންޖެހެނީ މިހެންވެއެވެ. މީހަކު ދައްކާ މީހަކާއި އެކު އެހެންމީހަކަށް އުޅުމަށް ފަސޭހަ ނުވާނެތީ އެވެ. އަދި އެމީހަކު އިޙްތިޔާރު ކުރާ މީހާއަކީ ގޯސްގޮތަކަށް ނޫޅޭ މީހެއް ނަމަ އެމީހަކާއި މެދު ހިތްހަމަ ނުޖެހުމެއް ބޭއްވުމުގެ މާނައެއް ނެތެވެ.
ތަނަވަސްކަމާއި، ސަނަދާއި، ނަސަބަކީ ދިރިއުޅުމުގެ ހަޔާތުގައި އެންމެ ބޭނުންތެރި އެއްޗެއް ނޫނެވެ. އެހެންނަމަވެސް ލޯތްބާއި، އޯގާތެރިކަމާއި، އަޅާލުންފަދަ ކަންކަމީ ހިތްހަމަ ޖެހުމަށް އޮތް މަގެވެ. ވީހިނދު ބައިވެރިޔާ ހިޔާލުކުރުމުގައި މިކަންކަން އިސްކުރުމަށް ދަރިންނަށް ފުރުސަތުދިނުމަކީ އެދަރިންނަށް އުފާވެރި ދިރިއުޅުމެއް ލިބުމަށް މަގުފަހިވާ ކަމެކެވެ.
