މާލޭގައި އިމާރާތް ކުރަމުން އަންނަ މާވެޔޮ މިސްކިތުން ބިއްލޫރި ޝީޓެއް ވެއްޓި، އެތަން އިމާރާތް ކުރަމުން ދިޔަ ދެ ބިދޭސީއަކަށް އަނިޔާ ވެއްޖެ އެވެ.
މި ހާދިސާ ހިނގާފައި ވަނީ، މާވެޔޮ މިސްކިތުގައި މަސައްކަތް ކުރުމަށް ބޭނުން ކުރި ބިއްލޫރި ޝީޓެއް މައްޗަށް ނަގަން އުޅުމުގެ ތެރޭގައި ކަމަށް ފުލުހުން ބުނެއެވެ.
އަދި އެ ދެ މީހުން އައިޖީއެމް ހޮސްޕިޓަލަށް ގެންގޮސް ފަރުވާ ދެމުންދާ ކަމަށް ފުލުހުން ބުންޏެވެ.
ފުލުހުން ބުނީ، ދެ މީހުންނަށް ވެސް މާ ބޮޑެތި އަނިޔާތަކެއް ނުލިބޭ ކަމަށެވެ. އެގޮތުން، އެކަކު އުނަގަނޑަށް ތަދުވާކަމަށް ބުނާއިރު، އަނެކަކުގެ އިނގިއްޔެއް ކަފައިގެން ގޮސްފައިވާ ކަމަށް ފުލުހުން ބުނެއެވެ. އަނިޔާވި ދެ މީހުން ވެސް ތިބީ ސޭފްޓީ ހެލްމެޓު އަޅައިގެންނެވެ.
ހަދަމުންދާ އިމާރާތްތަކުން އެއްޗެހި ވެއްޓި މަގުމަތިން ހިނގާފައި ދާ މީހުންނަށް އަނިޔާ ވުމާއި، މަސައްކަތް ކުރާ މީހުންނަށް އަނިޔާވުން ފަދަ ހާދިސާތައް ވަނީ އާންމު ވެފައެވެ.
