ރާއްޖެ އިން މީހުން ހައްޖަށް ގެންދާތާ 35 އަހަރު ވެފައިވާ ސިސިލްފަރު ހައްޖު އެންޑް އުމުރާ ގުރޫޕުން އިސްލާމިކް މިނިސްޓްރީއާ ދެކޮޅަށް ސިވިލް ކޯޓަށް ހުށަހެޅި މައްސަަލަ ޑިސްޕިއުޓް މަރުހަލާގައި މަޝްވަރާ ކޮށްގެން ހައްލު ނުވުމުން އެ މައްސަލަ ޝަރީއަތް ގެންދަން ނިންމައިފިއެވެ. އެ ޖަމާއަތުން އިސްލާމިކް މިނިސްޓްރީއާ ދެކޮޅަށް މައްސަލަ ހުށައެޅީ މިއަހަރު ހައްޖަށް މީހުން ގެންދިއުމުގެ ހުއްދަ ދިން ކުންފުނިތައް ކަނޑައެޅުމުގައި އޮޅުވާލުންތަކެއް ވާކަމަށްބުނެ، ހައްޖަށް ގެންދިއުމުގެ ހުއްދަ ނުލިބުމުން ނެވެ.
ސިސިލްފަރުން އިސްލާމިކް މިނިސްޓްރީއާ ދެކޮޅަށް ކޯޓަށް ހުށަހެޅި މައްސަލައިގައި، އެދިފައިވަނީ ހައްޖަށް މީހުން ގެންދިއުމުގެ ހުއްދަ ދިނުމަށް ކުންފުނިތައް ހޮވުމަށް ކުރިއަށް ގެންދިޔަ އިވެލުއޭޝަން ޕްރޮސެސް ސައްހަ ނޫން ކަމަށް ކަނޑައަޅައިދިނުމަށެވެ.
މި މައްސަލާގައި ސިސިލްފަރުގެ ގާނޫނީ ވަކީލް ނާޒިމް ސައްތާރު ވަނީ މި މައްސަލަ ޑިސްޕިއުޓް މަރުހަލާގައި ހައްލު ނުވުމުން ޝަރީއަތައް ފޮނުވަން ނިންމާފައިވާކަން ކަށަވަރު ކޮށްދީފައެވެ. ސިސިލްފަރަށް މިފަހަރު ލިބުނީ އެންމެ 0.7 އިންސައްތަ މާކްސްއެވެ.
ަ
