ޖެންޑަ މިނިސްޓްރީގެ ބެލުމުގެ ދަށުގައިވާ 341 އެއް ފަރާތަކަށް އެހީވުމުގެ ގޮތުން ޔޫތު މިނިސްޓްރީގެ ފަރާތުން 16 ޓީވީ ހަދިޔާކޮށްފި އެވެ.
މިކަން އިއުލާންކޮށްފައިވަނީ ޖެންޑަރ މިނިސްޓްރީ އާއި ޔޫތު މިނިސްޓްރީ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައެވެ.
ޓީވީތައް ހަދިޔާކޮށްފައި ވަނީ ކުޑަ ކުދިންގެ ހިޔާ އާއި ފިޔަވައްޗަށާއި، ހާއްސަ އެހީއަށް ބޭނުންވާ މީހުންގެ މަރުކަޒަށާއި، އަތޮޅުތަކުގެ ފެމެލީ އެންޑް ޗިލްޑްރަން ސާވިސް ސެންޓަރުތަކަށެވެ.
ކުޑަ ކުދިންގެ ހިޔާ އަށް ފަސް ޓީވީ ހަދިޔާ ކޮށްފައިވާއިރު ފިޔަވައްޗަށް ހަދިޔާކޮށްފައިވަނީ ދެ ޓީވީއެވެ. ހާއްސަ އެހީއަށް ބޭނުންވާ މީހުންގެ މަރުކަޒަށް ހަތަރު ޓީވީ ހަދިޔާކުރިއިރު އަތޮޅުތަކުގެ ފެމެލީ އެންޑް ޗިލްޑްރަން ސާވިސް ސެންޓަރުތަކަށް ފަސް ޓީވީ ހަދިޔާކޮށްފައިވެ އެވެ.
“މި މަރުކަޒުތަކުގައި ތިބި ކުދިންނަށް ކުޅިވަރުކުޅުމާއި މުނިފޫހި ފިލުވުމަށް ބޭނުންވާ ވަޞީލަތްތައް ފޯރުކޮށްދިނުމަށް ޔޫތު މިނިސްޓްރީން ވަނީ ނިންމާފަ. މިއީ ލިބިގެންދާ ވަރަށް ބޮޑު ކުރިއެރުމެއް. އަދި މިނިސްޓްރީން ހަދިޔާކުރި 16 ޓީވީ އަކީވެސް ވަރަށް ބޮޑު އެހީތެރިކަމެއް.” ޔޫތް މިނިސްޓްރީން ދެއްވި އެހީ އާއި ޙަވާލްވެ ވަޑައިގެން ޖެންޑަރ މިނިސްޓަރ ޝިދާތާ ޝަރީފް ވިދާޅުވިއެވެ.
މި ބައްދަލުވުމުގައި ޔޫތު މިނިސްޓަރ އަޙުމަދު މަޚުލޫފުވެސް ބައިވެރިވެވަޑައިގެންނެވިއެވެ. މިބައްދަލުވުމުގައި ވާހަކަ ދައްކަވަމުން މަޙްލޫފް ވިދާޅުވީ ދައުލަތުގެ ބެލުމުގައި މާލީގޮތުން ފުދުންތެރިކަންހުރި ޢާއިލާތަކުންވެސް ދައުލަތުގެ ދަށަށް ކުދިން ގެނެސްފައިވާ ކަމަށާއި އެތަންތާނގާއި ތިބޭ މީހުންނާއި ކުދިންގެ ޢާއިލާތަކުން އެމީހުން ޙާލު ނުބަލާ ކަމަށެވެ. އަދި މިކަމާ ވަރަށް ހިތާމަ ކުރައްވާ ކަމަށްވެސް މަހްލޫފް ވިދާޅުވިއެވެ.
ކުޑަކުދިންގެ ހިޔާގައި 41 ކުދިން، ފިޔަވަތީގައި 104 ކުދިން، ޚާއްޞަ އެހީއަށް ބޭނުންވާ މީހުންގެ މަރުކަޒުގައި 190 މީހުން ތިބިއިރު، އަތޮޅުތެރޭގެ ފެމެލީ އެންޑް ސާރވިސް ސެންޓަރު ތަކުގައި 6 ކުދިން އެބަ ތިއްބެވެ.
