އަވައްޓެރި ސްރީލަންކާގައި މިދިޔަ އާދީއްތަ ދުވަހު ދިން ޓެރަރިސްޓް ހަމަލާތާކާއި ގުޅިގެން ފެށި އޮޕަރޭޝަނެއްގައި ހައްޔަރު ކުރި ދިވެހިންގެ ތެރެއިން އެކެއްގެ ބަންދަށް 13 ދުވަސް ކޯޓުން ޖަހައިދީފި އެވެ. މި އޮޕަރޭޝަންގައި ވަނީ ހަ ދިވެހީން ހައްޔަރުކޮށްފައެވެ.
ހައްޔަރުކުރި މި ހަ ދިވެހީންގެ ތެރެއިން މިއަދު ބަންދަށް 13 ދުވަސް ޖަހައިފައިވަނީ ހައްދުފަހަނައަޅާފައިވާ އައިއެސް ޖަމާއަތުގެ ވާހަކަ ހިމެނޭ ފޮތެއް ގެންގުޅެނިކޮށް ސުވާލު ކުރި ދިވެހި މީހާއަށެވެ. އޭނާގެ ބަންދު މުއްދަތު ޖެހީ މައުންޓްލެވެނިއާގެ މެޖިސްޓްރޭޓް ކޯޓުންނެވެ.
އަނެއް ފަސް މީހުން ކޯޓަށް ހާޒިރު ކުރާނީ އަންނަށް ހޯމަ ދުވަހު އެވެ. މީގެ ތެރެއިން ހަތަރު މީހުންނަކީ ލަންކާގައި ފްލައިޓް އިންޖިނިއަރިން ކިޔަވަމުން އައި ބައެކެވެ. އެ މީހުން ހައްޔަރު ކުރީ ދިރިއުޅުނު ގެ ބަލައި ފާސް ކުރި އިރު އެ ގެއިން ޖަނަވާރު ޝިކާރަ ކުރަން ބޭނުން ކުރާ ޒާތުގެ ބަޑިއެއް ފެނިގެންނެވެ. އެބަޑި ވިއްކި ތަނުން އެމީހުނަށް ދީފައި ވަނީ ފޭކު ލައިސަންސްއެކެވެ.
ލަންކާގައި ހުންނަ އަޅުކަންކުރާ ތަންތަނަށާއި ހޮޓެލް ތަކަށް ދިން ހަމަލާތަކުގައި މިހާތަނަށް 359 މީހުން ވަނީ މަރުވެ 500 އަށްވުރެ ގިނަ މީހުންނަށް ވަނީ އެކި ވަރުގެ ގެއްލުން ތައް ލިބި ހަސްފަތާލުތަކުގައި ފަރުވާދީފައެވެ.
މި ހަމަލާތަކާއި ގުޅިގެން މިހާތަނަށް 60 ހަށް ވުރެ ގިނަ މީހުން ހައްޔަރުކުރެވިފައިވާއިރު، ތުހުމަތުކުރެވޭ އިތުރު ބަޔަކު ހޯދަންވެސް ލަންކާ ފުލުހުން ވަނީ އިއުލާނުކޮށްފަ އެވެ. ހަމަލާތައް ހުއްޓުވަން ސަލާމަތީ ބާރުތައް ނުކުޅެދުނުކަމުގެ ތުހުމަތުތަކާއެކު، އެގައުމުގެ ސަލާމަތީ ބާރުތަކުގެ އިސް ދެ ވެރިއަކު އިސްތިއުފާދެއްވުމަށް ރައީސް މައިތިރިޕާލަ ސިރިސޭނަ ވަނީ އެދިވަޑައިގެންފައެވެ.
