ފޭދޫގައި މިހާރު ކުރިއަށްދާ ހައިޑްރޯ ފުޓްސެލް ކަޕް 2019އިގެ މެޗް ބަލަން ވަންނަ ސަޕޯޓަރުންނަށް ސޯފާ ސެޓެއް ލިބިގެން ދާނެއެވެ.
މިމުބާރާތުގެ ސެމީ ފައިނަލުގެ މެޗް ތަކުން ފެށިގެން މިރެއާއި ހަމަޔަށް ދަނޑަށް ކުޅިބަލަން ވަންނަ ކޮންމެ މީހަކަށް ބައިވެރި ވެވޭ ލަކީ ޑްރޯ އެއް ވަނީ ހުޅުވިފައެވެ. މި ލަކީ ޑްރޯގައި ބައިވެރިވާ ފަރާތްތަކުގެ ތެރެއިން ގުރުއަތުން ހޮވޭ ފަރާތަކަށް މިމުބާރާތުގެ ސްޕޮސްސަރ ކަމަށް ވާ ހައިޑްރޯމޯލްޑިވްސްއިން ވަނީ އަގުބޮޑު ސޯފާ ސެޓެއް ހުށަހަޅާފައެވެ.
މިރޭގެ 20:30 ގައި ފޭދޫގެ ފުޓްބޯޅަ ދަނޑުގައި ކުޅުމަށް ހަމަޖެހިފައިވާ ފައިނަލް މެޗް ފެށުމުގެ ކުރިންނާއި އަދި މެޗްގެ ހާފް ޓައިމް ބްރޭކް ގައި މި ގުރުއަތުގައި ބައިވެރިވުމަށް ސަޕޯޓަރުންނަށް ކޫޕަން ދޫކުރާ ގޮތަށް ހަމަ ޖެހިފައިވާ ކަމަށް މުބާރާތް ހިންގާ ފަރާތްކަމަށްވާ ފްރެންޑްސް ކްލަބުން ވިދާޅުވިއެވެ.
އެޖެންޑާ ކުރެވިފައި އޮތީ ފައިނަލް މެޗްގެ ރަސްމިއްޔާތުގައި ސޯފާ ސެޓް ލިބޭ ނަޞީބުވެރިފަރާތާއި ސޯފާސެޓް ޙަވާލްކުރާ ގޮތަށްކަމަށާއި، މިއީ، ކުޅިވަރަށް ލޯބިކުރައްވާ ފަރާތްތަކަށް ރޯދަޔަށް ހަދިޔާއެއް ދިނުމުގެ ބޭނުމުގައި އާއި މިހާރަކަށް އައިސް ދަނޑަށް ކުޅިބަލަން ވަންނަ މީހުން މަދުކަމަށް ފެންނާތީ އެކަން ރަނގަޅު ކުރުމުގެ ނިޔަތުގައި ކުރިއަށް ގެންދިއުމަށް ހަމަޖެހުުނު ކަމެއްކަމަށް މިކްލަބުން ހާމަ ކުރެއެވެ.
މިރޭގެ ފައިނަލް މެޗްގައި ބައްދަލުކުރާނީ ހިތަދޫގެ އެފްސީ ޒެފިއަރ އާއި ފޭދޫ ހަބޭސް ޓީމެވެ. މުބާރާތުގެ ޗެމްޕިއަންޓީމަށް 20000 ރުފިޔާ އާއި ވާދައިގެ ތައްޓެއް ހުށަހެޅިފައިވާއިރު ރަަނައަޕް ޓީމަށް 8000ރުފިޔާ ލިބޭނެއެވެ.
