މަންދު ކޮލެޖްގެ މުވައްޒަފުންނާއި، އެކޮލެޖްގެ ދަރިވަރުންނަށް އުނދަގޫވާގޮތަށް މުޒާހަރާ ކުރާކަމަށްބުނެ އެކޮލެޖް އިން ހިތްހަމަ ނުޖެހުން ފާޅުކޮށްފިއެވެ.
މިކަމާއި ގުޅިގެން އެކޮލެޖް އިން ނެރުނު ނޫސް ބަޔާނުގައި ވާގޮތުން، އެކޮލަޖަކީ އެއްވެސް ހާލެއްގައި ސިޔާސީ ތަނެއް ނޫންކަމަށާއި، އެއީ ތައުލީމީ މުވައްސަސާއެއް ކަމަށް ބުނެފައި ވެއެވެ. އެގޮތުން އެކޮލެޖްގެ މުވައްޒަފުންނާއި ދަރިވަރުންނަށް އުނދަގޫވާގޮތަށް ކޮލެޖް ކުރިމަތީގައި ކުރަމުންދާ ސިލްސިލާ މުޒާހަރާތައް ހުއްޓާލުމަށް ވެސް އެބަޔާނުގައި އެދިފައި ވެއެވެ. އަދި ކޮލެޖްގެ އިމާރާތަށް ގެއްލުން ދިނުން ކަހަލަ ކަންތައް ކުރުމުން ހުރަސް އެޅިގެން ދަނީ ވަރަށް ގިނަ ދަރިވަރުންގެ ކިޔެވުމަށްކަމަށް ވެސް ބުނެފައި ވެއެވެ.
މީގެ އިތުރުން އެބަޔާނުގައި ވާގޮތުން އެކޮލަޖަކީ އެއްވެސް އިރެއްގައި ސިޔާސީ އެއްވެސް ހަރަކާތެއްގައި ޝާމިލްވާތަނެއް ނޫންކަމަށާއި، މިގޮތަށް އެކޮލެޖް ކުރިމަތީގައި އެއްވެ ޝުޢޫރު ފާޅުކުރުމަކީ ތައުލީމަށް އެޅިގެންދާނެ ވަރަށް ބޮޑު ހުރަހެއްކަމަށެވެ.
ފަހަކަށް އައިސް މަންދު ކޮލެޖް ކުރިމަތީގައި ސިލްސިލާ މުޒާހަރާތައްކޮށް ނުރުހުން ފާޅުކުރަމުން ގޮސްފައި ވެއެވެ. މިމުޒާހަރާތަކަކީ އެކޮލެޖްގެ ޗެއަރމަން އިބްރާހީމް އިސްމާޢީލް އިސްލާމް ދީނަށް ފުރައްސާރަކޮށް ވާހަކަ ދައްކަމުންދާތީ އެކަން ކުއްވެރިކޮށް ނުރުހުން ފާޅުކުރުމުގެ ގޮތުން ހިންގާ ހަރަކާތްތަކެކެވެ. މިމައްސަލައިގައި އޭނާ ވަނީ ފުލުހުން އޮފީހަށް ގެންގޮސް ދޫކޮށްލައިފައެވެ.
މަންދު ކޮލެޖް ކުރިމަތީގައި ބަޔަކު މީހުން އެއްވެ ޝުޢޫރު ފާޅު ކުރަމުންދަނީ ސިޔާސީ ކަމެއްގައި ނޫންކަމަށާއި، އެއީ އެކޮލެޖްއިން އިސްލާމް ދީނަށް ފުރައްސާރަ ކުރާތީ އެކަމާއި ހިންހަމަ ނުޖެހިގެން ކުރާ ކަމެއްކަމަށް މި އެއްވުމުގައި ބައިވެރިވާ ފަރާތްތަކުން ބުނަމުން ދެއެވެ.
