ދިވެހިރާއްޖޭގެ ރައީސުލްޖުމްހޫރިއްޔާ އަދި ރައީސުލްޖުމްހޫރިއްޔާގެ ނާއިބު ކަމުގެ ހުވާ ކުރެއްވުމުގެ ރަސްމިއްޔާތުގައި 46 ގައުމަކުން މަތީ ފަންތީގެ އިއްޒަތްތެރިން ބައިވެރިވެވަޑައިގަތުމަށްނހަމަޖެހިފައިވާކަމަށް ފޮރިން މިނިސްޓްރީން ބުނެފިއެވެ.
މިއަދު ހަވީރު 5:00ގައި ގަލޮޅު ދަނޑުގައި ބާއްވާ ހުވާކުރުމުގެ ރަސްމިއްޔާތުގައި ބައިވެރިވެވަޑައިގަންނަވާ ބޭރުގެ އިއްޒަތްތެރިންގެ ތެރޭގައި އިންޑިއާގެ ބޮޑުވަޒީރު ނަރެންދްރަ މޯދީ، ސްރީލަންކާގެ ކުރީގެ ރައީސް ޗަންދްރިކާ ބަންޑާރަނައިކެ ކުމާރަތުންގަ، ސަލްމާން ބިން ޢަބްދުލްޢަޒީޒް އަލަސޫދްގެ ޚާއްސަ މަންދޫބެއްގެ ގޮތުން ޑރ. މަންސޫރް ބިން މިތެބް ބިން ޢަބްދުލްޢަޒީޒް، ޔޫ.އޭ.އީގެ ކްރައުން ޕްރިންސްގެ ދަރިކަލުން ޝެއިޚް ހައްމާދް ބިން މުޙައްމަދު ބިން ޒައިދް އަލް ނަހްޔާން، ޕާކިސްތާނުގެ ޤާނޫނު ހަދާ މަޖިލީހުގެ ރައީސް މުޙައްމަދު ޞާދިގު ސަންޖްރަނި، ސްރީލަންކާގެ މިނިސްޓަރ އޮފް ފޮރިން އެފެއާޒް ޑރ. ސަރަތު އަމުނުގަމަ، ސްރީލަންކާގެ މިނިސްޓަރ އޮފް ޕްރޮވިންޝަލް ކައުންސިލްސް، ލޯކަލް ގަވަންމަންޓް އެންޑް ސްޕޯޓްސް ފައީޒަރް މުސްޠަފާ، ފަލަސްތީނުގެ މިނިސްޓަރ އޮފް ފޮރިން އެފެއާޒް އެންޑް އެކްސްޕެޓްރިއޭޓްސް ޑރ. ރިއާދު މަލިކީ، މިނިސްޓަރ އޮފް ކަލްޗަރ އެންޑް ޓޫރިޒަމް، އަދި ޗައިނާގެ ރައީސްގެ ޚާއްސަ މަންދޫބު ލުއޯ ޝުގަންގ، ޖަޕާނުގެ ބޮޑުވަޒީރުގެ ޚާއްސަ މަންދޫބު ވަޓަރު ޓެކެޝިޓާ، މޮރޮކޯގެ ރަސްގެފާނުގެ ޚާއްސަ މަންދޫބު މޫނިޔާ ބޫސެޓާ، ސީޝެލްސްގެ ސެކްރެޓަރީ އޮފް ސްޓޭޓް ކެބިނެޓް އެފެއާޒް މުޙައްމަދު އަފީފް، ތުރުކީގެ ޑެޕިއުޓީ ފޮރިން މިނިސްޓަރ އަދި ތުރުކީގެ ރައީސްގެ ޚާއްސަ މަންދޫބު ޔަވުޒް ސެލިމް ކިރަން، ޕޮލިޓިކަލް ޑައިރެކްޓަރ އޮފް ދަ މިނިސްޓްރީ އޮފް ފޮރިން އެފެއާޒް އަދި ސަރބިއާގެ ރައީސްގެ ޚާއްސަ މަންދޫބު އެމްބަސަޑަރ ޒޯރަން ވުޖިކް، ޔޫރަޕިއަން ޔޫނިއަން އެކްސްޓަރނަލް އެކްޝަން ސަރވިސްގެ ޑެޕިއުޓީ ސެކްރެޓަރީ ޖެނެރަލް ޖޯން ކްރިސްޓޯފް ބެލިއާރޑް، އިންޓަރ ޕާލަމަންޓްރީ ޔޫނިއަންގެ ސެކްރެޓަރީ ޖެނެރަލް މާޓިން ޗުގޮންގ އަދި ސާކުގެ ސެކްރެޓަރީ ޖެނެރަލް އަމްޖަދު ޙުސައިން ބީ ސިއާލްއެވެ.
މީގެ އިތުރުން، މި ރަސްމިއްޔާތުގައި އެކި ގައުމުތަކުގެ ސަފީރުންނާއި، ސަރުކާރުގެ އިސް އޮފިޝަލުންނާއިި ބޭރުގެ ބައެއް ވިޔަފާރިވެރިން ބައިވެރިވެވަޑައިގަތުމަށްވެސް ހަމަޖެހިފައިވާކަމަށް ފޮރިން މިނިސްޓްރީން ބުނެއެވެ.
މީގެ ތެރެއިން ބައެއް ޢިއްޒަތްތެރިން، ރައީސުލްޖުމްހޫރިއްޔާގެ އަރިހަށް އިހްތިރާމްގެ ޒިޔާރަތް ކުރެއްވުމަށްވަނީ ހަމަޖެހިފައެވެ. އަދި 17 ނޮވެމްބަރު 2018 ދުވަހުގެ ރޭ ކުރުނބާ މޯލްޑިވްސްގައި ބޭއްވުމަށް ހަމަޖެހިފައިވާ ރަސްމީ ފަރިއްކޮޅުގައިވެސް ބައެއް ބޭފުޅުން ބައިވެރިވެވަޑައިގަންނަވާގޮތަށް ވަނީ ހަމަޖެހިފައެވެ.
ރައިސުލްޖުމްހޫރިއްޔާގެ މަގާމާއި ހަވާލުވުމަށް އިބްރާހިމް މުހައްމަދު ސޯލިހު ހުވާ ކުރައްވާ ރަސްމިއްޔާތުގައި މިހާރުގެ ރައީސް އަބްދުﷲ ޔާމީން އަބްދުލް ގައްޔޫމް ބައިވެރިވެ ވަޑައިނުގަންނަވާނެ ކަމަށް އެމަނިކުފާނުގެ ތަރުޖަމާނު އިބްރާހިމް މުއާޒު އަލީ ވަނީ ވިދާޅުވެފައެވެ. .ރަސްމިއްޔާތުގައި ރައީސް ޔާމީން ބައިވެރިވެވަޑައިނުގަންނަވަނީ އެމަނިކުފާނުގެ އެތައް ހާސް ސަޕޯޓަރުންގެ އެދިލެއްވުމަށް އިހްތިރާމް ކުރުމުގެ ގޮތުންކަމަށް ވެސް މުއާޒު ވިދާޅުވިއެވެ.
