ލޮޓަސް އިން ދޭތެރެ ދޭތެރެ އިން ހިލޭ ސައިކަލް ހަދިޔާކުރަމުން އަންނަ އިރު މިފހަރު އެ ކުންފުނިންވަނީ އެމްޑީޕީގެ ސޯޝަލް މީޑިއާގެ އެންމެ ވަރުގަދަ އެކްޓިވިސްޓުންގެ ތެރޭގައި ހިމެނޭ ތޮއްޔިބު ޝަހީމާއި ޝައްމޫން ޖަލީލް (ލޫކަސް) އަދި އަހުމަދު އަންވަރު (ސިމްވާ) އަށް ހިލޭ ސައިކަލް ދޭން ނިންމައިފި އެވެ
ލޮޓަސް އިން މިކަމާއި ގުޅޭ ގޮތުން މައުލޫމާތު ހިއްސާކުރަމުން، ލޮޓަސް ބައިކް ޝޮޕްގެ ވެރިޔާ އަހްމަދު އާރިފް (އާއްޓެ) ވިދާޅުވީ އެ ތިން މީހުންނަށް ސައިކަލް ދޭން ނިންމީ މި ސަރުކާރުގެ އަނިޔާވެރިކަމާ ދެކޮޅަށް ފާޅުގައި ބަސްބުނުމުގެ ނަތީޖާއެއްގެ ގޮތުން ކުރިމަތިލާން ޖެހުނު ހާލަތުގެ އަގު ވަޒަންކުރުމުގެ ގޮތުންނެވެ. އަދި މި ތިން މީހުންނަށްވެސް އެމީހުން ބޭނުން ސައިކަލެއް ނެގުމުގެ ފުރުސަތު އޮންނާނެކަމަށާއި އެ މީހުން ހަމައެކަނި ކުރަން ޖެހޭނެ ކަމަކީ ރަޖިސްޓްރީ ފީ ދެއްކުންކަމަށް އާއްޓެ ވިދާޅުވިއެވެ
މީގެ އިތުރުން އާއްޓެ ވިދާޅުވީ އަނިޔާވެރިކަމާ ދެކޮޅަށް، ހައްގުތަކަށް ވަކާލާތުކޮށް އިންސާފަށް އަޑުއުފުލި ގިނަ ބައެއްގެ މަސައްކަތް ފަނޑުވެގެން ނުދާނެކަމަށެވެ. އަދި މި ތިން މީޙުންނަށް ސައިކަލް ދިނުމަކީ އެހެން މީހުން ކުރި މަސައްކަތުގެ އަގުވަޒަން ނުކުރުން ނޫންކަމެއް އައްޓޭ ވިދާޅުވިއެވެ
މިހާރު އަމިއްލަ އަށް އަރުވާލެވިގެން ސްރީ ލަންކާގައި މި ތިން މީހުން ވެސް ދިރިއުޅެމުން އަންނައިރު،ސްރީލަންކާއަށް މި މީހުން ބަދަލުވީ ސަރުކާރަށް ފާޑުކިޔައި ކުރި ޓުވީޓްތަކާ ގުޅިގެން ޕޮލިހަށް ހާޒިރުކޮށް ސުވާލުކުރަން ފެށުމުންނެވެ
