ގައުމުން ބޭރަށް އަރުވާލެވިގެން ހުންނަވާ ކުރެވުނު އެންމެ މުހިއްމު މަސައްކަތަކީ ރައީސް އަބްދުﷲ ޔާމީންގެ ސަރުކާރުން ހިންގާފައިވާ ކަރޮޕްޝަނާ ގުޅުންހުރި މައްސަލަތަކުގެ ހެކިތައް އެއްކޮށް، އެ މަސައްކަތްތައް ފަޅާއަރުވާލުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ލަންޑަންގެ ސައުތު އޭޝިއާ އިނިސްޓިޓިއުޓްގައި ރޭ ތަގުރީރު ކުރައްވަމުންރައީސް ނަޝީދު ވިދާޅުވީ ރާއްޖޭން ބޭރުން ސިޔާސީ ހިމާޔަތް ހޯއްދަވައިގެން ހުންނަވާ، ރައީސް ޔާމީންގެ ސަރުކާރުގެ ކޮރަޕްޝަންގެ އަމަލުތަކުގެ މައުލޫމާތު ފަޅާއަރުވާލެވުމާ ގުޅިގެން ރައީސް ޔާމީން ހިންގަވަން އުޅުއްވި ޕްރޮޕެގަންޑާ އެތައް ކަމަކަށް ހަމަލާދީ ބަލިކަށި ކޮށްލެވުނު ކަމަށެެވެ.
“އިނގިރޭސިވިލާތުގައި ލިބިފައި އޮތް ސިޔާސީ މިނިވަންކަމުގެ ބޭނުންކުރީ ރާއްޖޭގެ ސިޔާސީ ފަރާތްތަކާ ބައްދަލުކޮށް ރާއްޖޭގައި ހިނގަމުން ދިޔަ ކޮރަޕްޝަނާއި ލާއިންސާނީ އަމަލުތައް ފަޅާއަރުވާ، އެފަދަ ކަންކަން ހުއްޓުވަން ” ކަމަށް ނަޝީދު ވިދާޅުވިއެވެ.
ނިމިގެން ދިޔަ ރިޔާސީ އިންތިހާބުގައި ރައީސް އަބްދުﷲ ޔާމީނަށް ނާކާމިޔާބީއާ ކުރިމަތިވެވަޑައިގެންނެވީ ރައްޔިތުންގެ އިހްސާސް އެނގިވަޑައިނުގަތުމުން ކަމަށްވެސް ރައީސް ނަޝީދު ވިދާޅުވި އެެވެ. ރައްޔިތުން ބޭނުންވަނީ ހަމައެކަނި ތަރައްގީގެ ސިޔާސަތެއް ތަންފީޒު ކުރުން ނޫން ކަން ފާހަގަކުރައްވަމުން ރައީސް ނަޝީދު ވިދާޅުވީ ރައްޔިތުންގެ ގާތަށް ވެރިން ވަޑައިގަތުމަށްވެސް ރައްޔިތުން ބޭނުންވާ ކަމަށެެވެ.
ރައީސް ނަޝީދުގެ ވެރިކަމުގައި ކްރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު ހައްޔަރުކުރި މައްސަލާގައި އެމަނިކުފާނު 13 އަހަރަށް ޖަލަށް ލުމަށް ހުކުމް ކުރުމުން ޖަލުގައި ކުޑަދުވަސްކޮޅަކު ހުންނެވުމަށްފަހު ބޭސް ފަރުވާއަށް ރާއްޖޭން ބޭރަށް ވަޑައިގެންނެވި ގޮތަށް ރައީސް ނަޝީދު ވަނީ އިނގިރޭސިވިލާތުން ސިޔާސީ ހިމާޔަތް ހޯއްދަވާފަ އެވެ.
