ރާއްޖޭގައި އުފެދިފައިވާ ޤާނޫނީ ސަރުކާރު، ވައްޓާލުމުގެ މަސައްކަތް 2015 ވަނަ އަހަރުން ފެށިގެން ކުރީގެ ރައީސް މަޢުމޫން ޢަބްދުލްޤައްޔޫމް ކުރައްވަމުންދިޔަކަމުގެ ހެކި ފެނިފައިވާކަމަށް ފުލުހުން ބުނެފިއެވެ.
އިސްކަންދަރު ކޮށީގައި ފުލުހުން ބޭއްވި ނޫސްވެރިންގެ ބައްދަލުވުމުގައި މަޢުލޫމާތުދެމުން ސްޕްރިންޓެންޑެންޓް އޮފް ޕޮލިސް އަޙްމަދު ޝިފާން ވިދާޅުވީ، 2015ވަނަ އަހަރު އަޙްމަދު އަދީބް ނާއިބްރައީގެ މަޤާމަށް އައްޔަންކުރެވުނު ހިސާބުން ފެށިގެން ކުރީގެ ރައީސް މަޢުމޫން ޢަބްދުލްޤައްޔޫމް، ރާއްޖޭގައި ޤާނޫނީގޮތުން އުފެދިފައިވާ ސަރުކާރު ޤާނޫނާ ޚިލާފަށް ވައްޓާލުމަށް މަސައްކަތްކުރަމުން ގޮސްފައިވާކަމުގެ ހެކި ލިބިފައިވާކަމަށެވެ.
ޝިފާން ވިދާޅުވީ، ފުލުހުން ހިންގި ތަހުގީގުން އެނގުނު ގޮތުގައި، 2015 ވަަނަ އަހަރު އަހުމަދު އަދީބް ނައިބްރައީސްކަމަށް އައްޔަން ކުރި ހިސާބުން ފެށިގެން ރައީސް މައުމޫން، ރައީސް އަބްދުﷲ ޔާމީންގެ ވެރިކަން ގާނޫނީ ގޮތުން ވައްޓާލުމަށްޓަކައި ތަފާތު މަސައްކަތްތަކެއް ކޮށްފައިވާކަމަށެވެ. އެގޮތުން ރައީސް ޔަމީންގެ ވެރިކަން ވައްޓާލުމަށް މަޖީލީހުގެ ތެރެއިން އެއިރުވެސް މަސައްކަތްކޮށްފައިވާކަަމަށް ޝިފާން ވަަނީ ފާހަގަކުރައްވާފައެވެ.
މީގެ އިތުރުން އިންޑިޔާ އިސްކޮށް ބާއްވައިގެން ޔޫރަޕުގެ ބައެއް ޤައުމުތަކާ ގުޅިގެން ރާއްޖެއަށް ދަތި ކުރުމުގެ ފިޔަވަޅު އެޅުމަށް ރާވާފައިވާކަންވެސް ތަޙްޤީޤަށް އެނގިފައިވާކަމަށްވެސް ފުލުހުން ބުނެއެވެ. އަދި ރާއްޖޭގެ ޝަރުއީދާއިރާގެ އިސް ފަރާތްތަކަށް ރިޝްވަތު ދީފައިވާކަމުގެ ސާބިތު ހެކި ފުލުހުންގެ ތަޙްޤީޤަށް ލިބިފައިވާކަމަށްވެސް ފުލުހުން ހާމަކުރެއެވެ. މިގޮތުން ފަނޑިޔާރުންނަށް ރިޝްވަތުގެ ގޮތުގައި މާލީ އެހީތެރިކަން ފޯރުކޮށްދިންކަން ތަހްޤީގަށް އެނގިފައިވާކަމަށް ފުލުހުން ބުނެއެވެ.
ޝިފާން ވިދާޅުވީ، 2016 ވަނަ އަހަރަށް ބަލާއިރު، އެ އަހަރުވެސް މަޖިލީހުގެ މެންބަރުންނަށް ރިޝްވަތުގެ ގޮތުގައި، ފައިސާ ހުށަހަޅައި އަދި ބައެއް ފަރާތްތަކަށް ރިޝްވަތުގެ ގޮތުގައި ފައިސާ ދީ އިދިކޮޅު ބައެއް ސިޔާސީ ފަރާތްތަކާއި ގުޅުވުމަށް ފާހަގަކުރެވިފައިވާކަމަށެވެ.
އަދި 2018 ވަނަ އަހަރުގެ ޖެނުއަރީ މަހުގެ 11 ވަނަ ދުވަހު، ފާރިސް މައުމޫން، މައުމޫން އަބްދުލް ގައްޔޫމް، އަބްދުﷲ ރިޔާޒް، އަހުމަދު ނަދީމް، އިލްހާމް އަހުމަދު، އަދި އަބްދުﷲ ސިނާން ދިވެހި ރާއްޖޭގެ ގާނޫނީގޮތުން އުފެދިފައުވާ ސަރުކާރު ވައްޓާލުމަށް މަޖިލީހުގެ ތެރެއިންނާއި، އެހެނިހެން ގޮތްގޮތުން ކުރިކަމަށް ފުލުހުންގެ ތަހުގީގު ފެށި ކަމަށް ޝިފާން ވިދާޅުވިއެވެ. އެ ތަހުގީގުން އެނގުނުގޮތުގައި، ފަނޑިޔާރުންނަށް ރިޝްވަތުގެ ގޮތުގައި ފައިސާދީފައިވާކަން ފުލުހުންގެ ތަހުގީގަށް އެނގިފައިވާކަމަށެވެ.
