ރާއްޖެ އާއި ހުޅަނގު އެފްރިކާގެ އައިވަރީ ކޯސްޓާ ދެމެދު ސިޔާސީ ގުޅުން ގާއިމްކޮށްފި އެވެ
މިއަދު ނިއުޔޯކުގައި ހުންނަ ރާއްޖޭގެ ދާއިމީ މިޝަންގައި ބޭއްވި ރަސްމިއްޔާތުގައި، ސިޔާސީ ގުޅުން ގާއިމްކުރުމުގެ އެއްބަސްވުމުގައި ސޮއި ކުރެއްވީ އދ. އިން ރާއްޖެ އަށް ކަނޑައަޅާފައި ހުންނަވާ ދާއިމީ މަންދޫބު ޑރ. އަލީ ނަސީރާއި އައިވަރީ ކޯސްޓުގެ ފަރާތުން އދ. އަށް ކަނޑައަޅާފައި ހުންނަވާ އެ ގައުމުގެ ދާއިމީ މަންދޫބު ބާނާޑް ޓަނޫހް-ބޫޗޯއާއެވެ
އާބާދީގައި ގާތްގަނޑަކަށް 24 މިލިއަން މީހުން އުޅޭ އައިވަރީ ކޯސްޓާ އެކު ރާއްޖެއިން ސިޔާސީ ގުޅުން ގާއިމުކޮށްފައިވާއިރު، ރާއްޖެއިން ވަނީ ވަރަށް ފަހުނީ ޒެމްބިއާ އެކު ވެސް ސިޔާސީ ގުޅުން ގާއިމްކޮށްފަ އެވެ.
އިވަރީ ކޯސްޓާއެކު ރާއްޖެއިން މިހާތަނަށް ސިޔާސީ ގުޅުން ގާއިމްކުރި ގައުމުތަކުގެ އަދަދު 167 އަށް އަރަ އިރު ރާއްޖެ އިން ވަނީ އދ. ގެ އެންމެ ބާރު ގަދަ އަދި އެންމެ ވާދަވެެރި ކައުންސިލް ކަމަށްވާ ސެކިއުރިޓީ ކައުންސިލްގެ މެމްބަރު ކަމަށް ވާދަ ކުރުމަށް ކުދި ގައުމުތަކުގެ ވޯޓު ހޯދުމުގެ ކެމްޕޭނެއްވެސް ފަށާފައެވެ
