ވ. ރަކީދޫގައި އަނިޔާވެރި ގޮތަކަށް މަރާލާފައި އޮއްވައި ފެނުނު މުހައްމަދު އިބްތިހާލުގެ މަރުދިޔަ އޭނާގެ މަންމަ އާފިޔާ މުހައްމަދުގެ ކިބައިން ބޭނުން ނުވާ ކަމަށް އިބްތިހާލްގެ މާމަ ޝާފިއާ މުހައްމަދު ކްރިމިނަލް ކޯޓުގައި މިއަދު ބުނެފި އެވެ.
އިބްތިހާލު މަރާލި މައްސަލައިގައި މިއަދު ބޭއްވި ޝަރީއަތުގެ މަޖިލީހުގައި އާފިޔާގެ މަންމަ ޝާފިއާ އިބްތިހާލްގެ ވާރިސެއްގެ ގޮތުން ހާޒިރުކޮށް މަރުގެ ދިޔަ ބޭނުންވޭތޯ ސާފު ކުރުމުން އޭނާ ބުނީ މަރުގެ ދިޔަ ބޭނުން ނުވާ ކަމަށެވެ.ޝާފިއާ އެގޮތަށް ބުނުމުން، މަރުގެ ދިޔައަކީ ކޮން އެއްޗެއް ކަން އެނގޭތޯ ގާޒީ މުހުތާޒް ފަހުމީ ސުވާލު ކުރެއްވި އެވެ. ޝާފިއާ ޖަވާބުގައި ބުނީ “އެއީ ކޯޗެއްކަން އަޅުގަނޑަކަށް ނޭންގޭ” އެވެ. މިހެން ޝާފިޔާބުނުމުން މަރުގެ އިޔަ އަކީ ކޮންއެއްޗެއްކަމާއި މަރުގެ ދިޔައިގެ ގޮތުގައި އެއްލައްކަ ރުފިޔާ ލިބޭނެ ކަން ގާޒީ ވަނީ ޝާފިއާއަށް ސާފުކޮށް ދެއްވާފަ އެވެ. އަދި ބޭނުން ނުވޭތޯ ތަކުރާރުކޮށް ސުވާލު ކުރެއްވި އެވެ. ޝާފިއާ ޖަވާބުގައި ބުނީ ” އެވެސް ބޭނުން ނޫން” ކަމަށެވެ.
އިބްތިހާލުގެ އިތުރު ވާރިސުން ތިބިތޯ ގާޒީ ޝާފިއާ ސުވާލު ކުރެއްވި އެވެ. އޭނާ ބުނީ އިތުރު ވާރިސުން ތިބޭކަން ނޭނގޭ ކަމަށާއި އާފިޔާގެ އިތުރު ދެ ކުދިން ތިބޭ ކަމަށެވެ. އެ ކުދިންނަށް ކިޔަނީ ކޮން ނަމެއްކަމާއި ކުދިންގެ އުމުރުވެސް ބުނާކަށް ނޭނގުނެވެ.
ކުދިންނާ ބެހޭ މައުމޫލޫމާތު އެނގޭ އިތުރު ފަރާތެއް ވާނެތޯ ގާޒީ އެހުމުން ޝާފިއާ ބުނީ ވ. ރަކީދޫ ކައުންސިލަށް އެނގޭނެ ކަަމަށެެވެ. އަދި ކުދިންގެ މައުލޫމާތު އެނގޭ ރަކީދޫ ތިން މީހެއްގެ ނަންވެސް ޝާފިއާ ވަނީ ދީފައެވެ.
އިބްތިހާލުގެ މައްސަލައަކީ ވާރިސުންގެ ބަސް ބޭނުންވާނެ މައްސަލައެއް ނޫން ކަމަށް ދައުލަތުން މިއަދު ވަނީ ބުނެފައެވެ. ދައުލަތުން ބުނީ އެމައްސަލައަކީ މަރަށް މަރު ހިފޭނެ މައްސަަލައެއް ނޫން ކަމަށެވެ. އެއީ އިސްލާމީ ޝަރީއަތުގައި މަންމައަކު ނުވަތަ ބައްޕައަކު ދަރިފުޅު މަރާލާ ހާލަތުގައި މަރަށް މަރު ނުހިފޭނެ ކަމަށް ބުނެފައިވާތީ ކަމަށް ދައުލަތުން ފާހަގަކުރި އެވެ.
އެކަމާ ގުޅިގެން ގާޒީ ވިދާޅުވީ މަރަށް މަރު ނުހިފުނު ނަމަވެސް މަރުގެ ދިޔަ ލިބިގަތުމަކީވެސް ވާރިސުންނަށް އޮންނަ ހައްގެ ކަމަށާއި އެހެން ކަމުން ޝާފިއާގެ ބަސް ނަގަން ނުޖެހޭ ސަބަބެއް ނެތް ކަމަށެވެ.
އިބްތިހާލްގެ މަރާ ގުޅިގެން، އެކަމުގައި އިހުމާލުވި ކަމަށް ބުނެ ދައުލަތުގެ ފަސް މުވައްޒަފަކަށް ދައުލަތުން ވަނީ ދައުވާކޮށްފަ އެވެ. އެ މައްސަލައިގެ ޝަރީއަތް ކުރިއަށް ގެންދަނީ ވަކިންނެވެ.
އިބްތިހާލްގެ މަންމަ އާފިޔާ މުހައްމަދު މަނިކުގެ މައްޗަށް އުފުލާފައިވަނީ ގަސްތުގައި ކުއްޖަކު މަރާލުމުގެ ކުށުގެ ދައުވާއެވެ. އިބްތިހާލު މަރުވީ އަނިޔާ ކުރުމުން ކަމަށް އާފިޔާ ވަނީ ޝަރީއަތުގެ މަޖިލީހުގެ އެއްބަސްވެފައެވެ.
