އާރތު އަވަރ ފާހަގަކުރުމަށް އައްޑޫސިޓީގައި ގިނަ ހަރަކާތްތަކެއް ކުރިއަށް ގެންގޮސްފިއެވެ.
ކޮންމެ އަހަރަކުވެސް މުޅި ދުނިޔޭގައި އަރތް އަވާގެ ގޮތުގައި ފާހަގަކުރަމުންގެންދާ ހަރަކާތް މިއަހަރުވެސް ރާއްޖޭގައި ކުލަގަދަކޮށް ކޮށްފައިވާއިރު މިއަހަރުގެ މައި ‘ސްވިޗް-އޯފް އިވެންޓް’ ގެ ހޯސްޓް ސިޓީއަކަށް ހަމަޖެހިފައިވަނީ އައްޑޫސިޓީއެވެ.
އަރތް އަވާ މޯލްޑިވްސް ކަންޓްރީ ޓީމް އަދި އީކޯ ކެއަރ މޯލްޑިވްސްއިން އައްޑޫގައި މި ދުވަސް ފާހަގަކުރުމަށް ތަފާތު ހަރަކާތްތަކެއް ކުރިއަށް ގެންގޮސްފައިވާއިރު ރެޑްކްރެސެންޓް އައްޑޫ ބްރާންޗުންނާއި އަމިއްލަ ޖަމިއްޔާ ޖަމާއަތްތަކުގެ އިތުރުން ސަރުކާރުގެ މުވައްސަސާތަކުން ވެސް ވަނީ އާރތު އަވާ ފާހަގަކޮށްފައެވެ.
އަރތު އަވާގެ ހަރަކާތްތައް ރަސްމީކޮށް އައްޑޫގައި ކުރިއަށް ގެންގޮސްފައިވަނީ މާޗް 24 ވީ ހޮނިހިރު ދުވަހުގެ ރޭ 8:30 އިން 9:30 އަށް ކަމަށެވެ.
މިއަހަރުގެ އަރތް އަވާ ހަރަކާތް ކުލަގަދަގޮތެއްގައި ފާހަގަ ކުރުމަށްޓަކައި އައްޑޫސިޓީ ކައުންސިލާއި، އައްޑޫގެ ޖަމްޢިއްޔާ ޖަމާޢަތްތަކާއި، އެހެނިހެން މުޢައްސަސާތަކާއި ގުޅިގެން އަރތް އަވާ މޯލްޑިވްސް އަދި އީކޯ ކެއަރ ގެ ޓީމުން ވަނީ މަސައްކަތް ކޮށްފައެވެ. މިގޮތުން ބޭންކް އޮފް މޯލްޑިވްސް، ފެނަކަ، އެމް.އެން.ޑީ.އެފް، މޯލްޑިވްސް ރެޑް ކްރެސެންޓް، އަންހެނުންގެ ތަރައްޤީއަށް މަސައްކަތްކުރާ ކޮމިޓީ، ސީކެޕް އަދި ބައެއް ޖަމްޢިއްޔާތަކާއެކު ކުރިއަށް ގެންދިޔަ ހަރަކާތްތަކުގެ އިތުރުން ޓްރާންސްޕޭރެންސީ މޯލްޑިވްސްގެ އެހީތެރިކަމާއެކު ވޒުވާނުންނަށާއި ޖަމްޢިއްޔާ ޖަމާޢަތްތަކަށް ހާއްސަ ކުރެވިގެން ‘އާރތް އަވަރ އެޑްވޮކެސީ ޓްރޭނިންގ’ ގެ ނަމުގައި ކައުންސިލް އިދާރާގައި ވަނީ ތަމްރީން ޕްރޮގްރާމެއްވެސް ހިންގާފައެވެ.
ހަމަ މިއާއެކު ރެޑްކެރެސެންޓުގެ ފަރާތުން އައްޑޫގައި އިއްޔެ ވަނީ ސާފުކުރުމާއެކު ދުވުމުގެ ހަރަކާތެއް ވެސް ބާއްވާފައެވެ.
‘ކްލީން އަޕް ރަން’ ގެ ނަމުގައި ކުރިއަށް ގެންދިޔަ ހަރަކާތުގެ މަޤްޞަދަކީ ތިމާ އުޅޭ ވެށި ސާފު ކޮށް ބެލެހެއްޓުމާއެކު ސިއްޙަތަށް ފައިދާ ވާ ކަހަލަ ކަމެއް ކުރުން ކަމަށް ދިވެހި ރެޑް ކްރެސެންޓުން ބުނެއެވެ.
ދިވެހި ރެޑް ކްރެސެންޓުގެ ދަރުމަވެރިންނާއި އާންމުން ބައިވެރިވި މި ހަރަކާތުގެ ބައިވެރިން ވަނީ ހިތަދޫ ސްކޫލު ކައިރިން ފެށިގެން ހިތަދޫ ބޮޑު މަގު ހުރަސް ކޮށް ކުނި ހޮވަމުން މަޑު ދުވުމެއްގައި ދުވެފައެވެ. މި ދުވުމުގެ ބައިވެރިން ވަނީ ހިތަދޫ ބޮޑު މަގުގައި ބަހައްޓާފައި ހުރި ގަސް ވަށިތައް ސާފު ކޮށް މަގުގެ އަރިމައްޗާއި މަގުގެ އެކި ހިސާބުތަކުގައި ހުރި ކުނި ނަގާ ސާފުކޮށްފައެވެ
މީގެ އިތުރުން އައްޑޫވިމެންސް އެސޯސިއޭޝަނުން ވަނީ އާރތު އަވަރ އާއި ގުޅުވައިގެން އައްޑޫގައި ބައިސްކަލް ރެލީއެއްވެސް ބާއްވާފައެވެ..
އަރތް އަވާ އަކީ ބައިނަލްއަގުވާމީ ޖަމްޢިއްޔާ ވޯލްޑް ވައިލްޑްލައިފް ފަންޑުން އިންތިޒާމުކޮށްގެން 2007 ވަނަ އަހަރުން ފެށިގެން ކުރިއަށްދާ ހަރަކާތެކެވެ. އަދި 2009 ވަނަ އަހަރުން ފެށިގެން ރާއްޖޭގައިވެސް އަރތް އަވާ ފާހަގަކުރުމުގެ ހަރަކާތްތައްދަނީ ބާއްވަމުންނެވެ.
ދުނިޔެ ހޫނުވުމާއި، ތިމާވެއްޓަށާއި މޫސުމަށް އަންނަ ނޭދެވޭ ބަދަލުތަކުގެ ސަބަބުން ލިބިދާނެ ގެއްލުންތަކުން ރައްކާތެރިވެ ތިބުމަށާއި، ގެއްލުން ކުޑަކުރުމުގެ ގޮތުން އެޅިދާނެ ފިޔަވަޅުތަކަށް އާންމުން ހޭލުންތެރި ކުރުމާއި، ފަރުދީ ފެންވަރުގައިއާއި މުޖުތަމަޢުގެ ފެންވަރުގައި ހަރަކާތްތެރިވުމަށް ގޮވާލައި ހިންގޭ މިހަރަކާތަކީ ބައިނަލްއަޤުވާމީ ގޮތުން މިއަދު ދުނިޔޭގައި ހިންގޭ އެންމެ ބޮޑު ގޮވާލުމެވެ. ދުނިޔެއަށްޓަކައި އެއްގަޑިއިރަށް ބޮކިތައް ނިއްވާލުމުގެ ރަމްޒީ މިހަރަކާތަކީ އަމަލީ ގޮތުން ތިމާވެށި ހިމާޔަތްކުރުމަށް މަސައްކަތް ކުރާ އަދި އެކަމަށް ބާރުއަޅާ ގޮވާލާ ހަރަކާތެކެވެ.
