ފުލުހުންގެ ސްޕެޝަލް އޮޕަރޭޝަންސްގެ ކުރީގެ ކޮމާންޑަރ ޢަބްދުﷲ އިބްރާހީމް ހައްޔަރުކޮށްފިއެވެ. މިއަދުގެ ވަގުތެއްގައި ޢަބްދުﷲ އިބްރާހިމް ހައްޔަރުކޮށްފައިވަނީ އިބްރާހީމް ނާސިރު އިންޓަނޭޝަނަލް އެއާޕޯޓުންކަމަށް މަޢުލޫމާތު ލިބެއެވެ.
އެންގިފައިވާ ގޮތުގައި ޢަބްދުﷲ އިބްރާހިމް ގއ. އަތޮޅަށް ފޮނުވާލާފައި ހުރީ ފެބްރުއަރީ މަހުގެ ތެރޭގައެވެ. އަދި އޭނާގެ ފޯނު ފެބުރުއަރީ މަހުގެ 26ވަނަ ދުވަހު ފުލުހުން ހިފަހައްޓާފައިވާކަމަށްވެސް މައުލޫމާތު ލިބެއެވެ. އަދި އޭނާ މިއަދު ފުލުހުން ހައްޔަރުކުރީ މާލެ އައުމަށް އަންގައިގެން އައިސް އެއާޕޯޓަށް ފޭބިތަނުން ކަމަށާއި އޭނާ ހައްޔަރުކޮށްގެން ފުލުހުންގެ ލޯންޗަކަށް އަރުވައިގެން ގެންދިއަ ވަގުތު އޭނާގެ އާއިލާގެ މީހުންވެސް އެއަރޕޯޓުގައި ތިބިކަމަށް ޚަބަރުލިބެއެވެ.
ޢަބްދުﷲ އިބްރާހީމް ހައްޔަރު ކުރިއިރު ފުލުހުންގެ އެސްއޯ (ސްޕެޝަލް އޮޕަރޭޝަންސް)ގެ ދަށުން ހިންގަމުން އަންނަ ސްޕެޝަލް ވެޕަންސް އެންޑް ޓެކްޓިކްސް (ސްވޮޓް) ގެ ކުރީގެ ކޮމާންޑަރު ސައިފްވެސް ހައްޔަރުކޮށް ފުލުހުންގެ ވަޒީފާއިން ވަކިކޮށްފައިވާ ކަމަށްވެސް މައުލޫމާތު ލިބެ އެވެ. މައުލޫމާތު ލިބިފައިވާ ގޮތުން ސައިފު ހައްޔަރު ކުރެވުނީ ފުލުހުންގެ ތެރޭގައި ހަމަނުޖެހުން ހިންގިކަމުގެ ތުހުމަތުގައެވެ. އަދި އޭނާ ވަޒީފާއިން ވަކިކޮށްފައިވަނީ ފުލުހުންގެ ކޯޑް އޮފް ކޮންޑަކްޓާ ޚިލާފުވުމުންނެވެ.
