މޭކަޕް ގެވާހަކަ ދައްކައިފިއްޔާ އެންމެ ފުރަތަމަ ދުލަށް އަންނާނީ ޗައިނާ އެވެ. ޗައިނާ އަކީ މޭކަޕް ގެ ވަރަށް ގިނަ ވައްތަރުތައް އުފައްދާ ގައުމެކެވެ. ޗައިނާ މަޝްހޫރު ވެފައިވަނީ މޭކަޕްގެ އުފެއްދުން ތަކަށް އެކަންޏެއް ނޫން ކަމަށް ދެބަސްވާނޭ އެއްވެސް ފަރާތެއް ނުހުންނާނެކަން ޔަގީނެވެ. ނަމަވެސް ދައްކަން މިއުޅެނީ ޗައިނާގެ އުފެއްދުން ތަކުގެ ވާހަކައެއް ނުނެވެ. ޗައިނާގެ އަންހެން ކުދީން ރީތިވުމަށް ބޭނުން ކުރާ ގުދުރަތީ އުކުޅުތަކުގެ ވާހަކައެވެ. ޗައިނާގެ އަންހެން ކުދީންނަށް ބަލައިލާ އިރު އެގައުމުގެ ގިނަ އަންހެން ކުދީންގެ ހަށިގަނޑުގެ ބައްޓަން ހުންނަނީ ވަރަށް ލޫޅާފަތި ކޮށް އެއްމިނެއްގައެވެ. ގައިގެ ހަންގަނޑަށް ބަލާލިޔަސް ހަންގަނޑުވެސް އެހާމެ އޮމާން ވެފައި ރީއްޗެވެ. މިހުރިހައި ކަމެއް މިހެން ބެހެއްޓުމަށް ޗައިނާ މީހުން ނަކީ ކޮންމެ ދުވަހަކުވެސް ވަކިގޮތަކަށް ކެއުން ބަހައްޓައި ހަންގަނޑަށް އެމީހުން އަމިއްލަޔަށް އުފައްދާ ގުދުރަތީ ފަރުވާ ކުރާ ބައެކެވެ. އެމީހުންގެ ކާބަފައިންގެ ޒަމާނުން ފެށިގެން މިއާދަތައް ގެންގުޅެއެވެ. ތިރީގައި މިވަނީ ޗައިނާގެ މީހުން ރީތިވުމަށް ބޭނުން ކުރާ 6 އުކުޅެކެވެ

މޫނުގެ ހަންގަނޑު އޮމާންކޮށް ރީތިކޮށް ބެހެއްޓުމަށް :

-އޮއިސްޓަރ ޝެލް ޕައުޑަރ،މާމުއި އާއި ރަނގަޅަށް އެއްކޮށްލާފައި ޕޭސްޓް ތައްޔާރުކޮށް ލައްވާށެވެ. މިޕޭސްޓް ކޮންމެ ދުވަހަކު މޫނުގައި އުނގުޅާށެވެ. ދެން 30 މިނެޓް މަޑުކޮށް ލުމަށްފަހު ދޮވެލާށެވެ

ނޯޓް: އޮއިސްޓަރ ޕައުޑަރ ގެ ބަދަލުގައި ޕާރލް ފޭސްމާސްކް ބޭނުން ކުރެވިދާނެއެވެ. ޗައިނާ މީހުން ހަންގަޑު ރީތިކުރުމަށް “ޕާރލް ޕައުޑަރ” ވެސް ބޭނުން ކުރެއެވެ

ޒުވާން ރީތި ހަންގަނޑަކަށް :

ޗައިނާ މީހުންގެ އެންމެ ގިނަ ބުއިމަކަށް ވަނީ “ގްރީން ޓީ” އެވެ. މީގެ ސަބަބުތަކަކީ

-ބަރުދަން ލުއިކުރުން

-ޒުވާން ކަންއިތުރުކުރުމަށް (ގްރީން ޓީގައިހުންނަ “ކެޓެޗިން” ކިޔާ މާއްދާއަކުން ހަށިގަނޑު ޒުވާން ކަމަށް ދައްކުވައިދެއެވެ)

-ހަށިގަނޑުގެ ދިފާއީ ނިޒާމު ވަރުގަދަ ކުރުމަށް އަދި ދުޅަހެޔޮ ސިއްޙަތަކަށް

ގްރީންޓީ ތައްޔާރު ކުރާއިރު ސައިފަތަށް ހޫނުފެން އެޅުމަށްފަހު 2-3 މިނެޓް ވަންދެން ބަހައްޓާށެވެ. އެޔަށްފަހު ބޭނުމިއްޔާ ލުނބޯ ނޫނީ މާމުއި އަޅައިގެން ރަނގަޅަށް ގިރާލުމަށްފަހު ބޯލާށެވެ

މޫނު އަލިކުރުމަށް :

ޗައިނާ މީހުންގެ މޫނުގެ ހަންގަނޑު އެހާ ތާޒާފެފަ ރީތީ ކީއްވެގެންހެއްޔެވެ؟ މިންޓް ފަތް ނޫނީ ކުދީނާ ފަތް ފުނޑައިގެން އޭގެ ޕޭސްޓް މޫނުގައި ކޮންމެ ދުވަހަކު އުނގުޅާށެވެ. މިއީ އެއްވެސް ކެމިކަލް އެއް ނުހިމެނޭ ފަރުވާއެކެވެ. އެންމެ ކުރީޒަމާނުން ފެށިގެންވެސް ޗައިނާމީހުން މިޕޭސްޓް މޫނުގެ ހަނގަޑުރީތިކުރުމަށް ބޭނުން ކުރެއެވެ

ގުދުރަތީ ރީތި ހަންގަޑަކަށް:

ނުދޮވެ ހުންނަ ހަނޑޫ ފެން އެއްޗަކަށް އަޅާފައި ކިރު ކުލަ ފެނަށް އަރަންދެން ސަމުސަލަކުން ފެނާއި ހަނޑޫ އެއްކޮށްލާށެވެ. ދެން ކަފަކޮޅަކުން މިފެން ގައިގެ ހަންގަނޑުގައި އުނގުޅާށެވެ. މިގޮތަށް ތައްޔާރުކޮށްފައި ހުންނަ ފެން 2-3 ދުވަސް ވަންދެން ފްރިޖްގައި ބެހެއްޓިދާނެއެވެ

މޫނުގެ ރޫތައް ފިލިވުމަށް:

ބިހުގެ ހުދުބައި ނަގާފައި މޫނުގައި އުނގުޅުމަށް ފަހު 20 މިނެޓްވަންދެން ބެހެއްޓުމަށް ފަހު ފިނިފެނުން ދޮވެލާށެވެ. ޗައިނާމީހުން މޫނުގެ ރޫތައް ފިލުވުމަށް ބޭނުން ކުރާ ގުދުރަތީ އެންމެ މޮޅު އުކުޅަކީ މިއީއެވެ

ހަންގަނޑުގެ ވަރުބަލިކަން ފިލުވުމަށާއި ތާޒާކުރުމަށް:

ހަންގަނޑުގެ ތާޒާކަން ދަމަހައްޓައި، ޒުވާންކޮށް ބެހެއްޓުމަށް ފޭޝަލް މަސާޖް އަކީ ޗައިނާ މީހުންގެ މެދުގައި މަގުބޫލު އުކުޅެކެވެ. އެގޮތުން މިފަރުވާއިން ހަށިގަނޑުގައި ލޭދައުރުވުން އިތުރުކޮށްދީ ހަންގަނޑުގައި ހުންނަ ސެލްތައް އާ ކޮށްދޭކަމަށްވެއެވެ. ފޭޝަލް މަސާޖް ކުރުމަށް ކަންފަތުގެ ކައިރިން

ފަށައިގެން، މަޑުމަޑުން އިނގިލިތަކުގެ ކުރިތަކުން ވަށްކޮށް މޫނު މަސާޖް ކުރާށެވެ. މަސާޖް ކުރާނީ އަތުގެ ހަރަކާތްތައް މައްޗަށް ބަހައްޓައިގެންނެވެ. މިގޮތަށް ކޮންމެ 15 ދުވަހުން މަސާޖުކޮށްލާށެވެ