ކުޑަކުދިންނަށް ޖިންސީ ގޯނާކުރުމާއި ބްލެކްމެއިލް ކުރުމުގެ ކުށް ސާބިތުވެފައިވާ ޖެފްރީ އެޕްސްޓީންއާ ގުޅުން ބޭއްވި ކަމަށް ތުހުމަތުކުރެވޭ މައްސަލައިގައި، ކުރީގެ ރައީސް ޑރ. މުހައްމަދު ވަހީދު ހަސަން މަނިކާ ދެކޮޅަށް މައްސަލައެއް ހުށަހަޅައިފިނަމަ އެކަން ތަހުގީގު ކުރާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރު އިހުސާން ވިދާޅުވީ، އެޕްސްޓީންއާ މުއާމަލާތްކޮށް ގުޅުން ބޭއްވި މައްސަލާގައި ރައީސް ވަހީދުގެ މައްޗަށް ޖިނާއީ ތުހުމަތެއްކޮށް ފުލުހުންގެ އިދާރާއަށް މިހާތަނަށް އެއްވެސް ފަރާތަކުން މައްސަލައެއް ހުށަހަޅާފައި ނުވާ ކަމަށެވެ. އަދި ފުލުހުން އަމިއްލައަށް އިސްނަގައިގެން ވެސް މިހާތަނަށް އެފަދަ ތަހުގީގެއް ފަށާފައި ނުވާ ކަމަށް އޭނާ ފާހަގަކުރެއްވި އެވެ.
ނަމަވެސް، ޖިނާއީ ކުށެއް ކޮށްފައިވާ ކަމަށް ގަބޫލުކުރެވޭ ހާލަތެއްގައި ނުވަތަ އެފަދަ މައްސަލައެއް ހުށަހެޅިއްޖެ ނަމަ، ވަކި މީހަކު އިސްތިސްނާ ކުރުމެއް ނެތި އެ މައްސަލައެއް ބައްލަވާނެ ކަމުގެ ޔަގީންކަން މިނިސްޓަރު ދެއްވި އެވެ. އެޕްސްޓީންއާ ގުޅުން އޮތްކަން ހާމަވާ ލިޔެކިޔުންތަކެއް ލީކުވުމާ ގުޅިގެން، ރައީސުލްޖުމްހޫރިއްޔާގެ ހާއްސަ މަންދޫބުގެ މަގާމުން ރައީސް ވަހީދު ވަނީ މިދިޔަ ފެބްރުއަރީ މަހު އިސްތިއުފާ ދެއްވާފަ އެވެ.
މިކަމާ ގުޅިގެން ރައީސް ވަހީދުގެ އޮފީހުން ނެރުނު ބަޔާނެއްގައި ބުނެފައިވަނީ، އެޕްސްޓީންއާ އެކު އޮތީ ހަމައެކަނި ރަސްމީ ގުޅުމެއް ކަމަށާއި، އޭނާ ހިންގި އެއްވެސް ލާއިންސާނީ އަމަލެއްގައި ރައީސް ވަހީދު ބައިވެރިވެވަޑައިގެންފައި ނުވާނެ ކަމަށެވެ. އަދި އެޕްސްޓީންގެ ހަގީގަތް ހާމަވުމުން، އެފަދަ މީހަކާ މުއާމަލާތް ކުރެވުނީތީ ރައީސް ވަހީދު ހިތާމަކުރައްވާ ކަމަށްވެސް އެ އޮފީހުން ބުންޏެވެ.
