ދިވެހި ކުންފުނިތަކުން ވަރަށް ރަނގަޅަށް ގަވައިދުން ސަރުކާރަށް ޓެކްސް ދައްކަމުންދާކަމަށް، މާލީ ކަންކަމާއި ތަރަށްގީގެ ރޭވުންތެރިކަމާއި ބެހޭ ވަޒީރު، މޫސާ ޒަމީރު ވިދާޅުވެއްޖެއެވެ.
ރައްޔިތުންގެ މަޖިލީހުގައި މިހާރު ކުރިއަށްދާ ބަޖެޓް ބަހުސްގައި ބައިވެރިވެވަޑައިގެން ވާހަކަފުޅު ދައްކަވަމުން ވަޒީރު ވިދާޅުވީ، ވޭތުވެދިއަ ދުވަސްތަކަށް ބަލާއިރު، ޓެކްސް ގަވައިދުން ދައްކާކަން ފާހަގަކުރެވެނީ ދިވެހިންގެެ ކުންފުނިތައް ކަށެވެ.
“އަޅުގަނޑުމެންނަށް ފާހަގަކުރެވޭ އެއްކަމަކީ ދިވެހިންގެ ކުންފުނިތަކުން ރާއްޖޭގަ އޮޕަރޭޓްކުރާ ދިވެހިންގެ ކުންފުނިތަކުން ވަރަށް ބަރާބަރަށް ޓެކްސް ދައްކަމުންގެންދާކަމަށް ފާހަގަކުރެވޭ. މިސާލަކަށް ބިޒްނަސް ޕްރޮފިޓް ޓެކްސް ކަމުގަވިއަސް.” ވަޒީރު ފާހަގަކުރެއްވި އެވެ.
މީގެ އިތުރުން ވަޒިރު ވިދާޅުވީ ދިވެހި ކުންފުނިތަކުގެ އިންވެސްތްމަންޓްގެ ފައިދާވެސް ދިގުމުއްދަތެއްގައި ޤައުމަށް ކުރަމުންދާކަމަށާއިި، އެގޮތުން ދިވެހި ކުންފުނިތައް ކޮޅަށްޖެހުމަށް ވެދެއްވެން އޮތް އެހީތެރިކަމަށް ކަންކަން މަގުފަހިކޮށްދިނުން މުހިންމު ކަމަށެވެ.
ވަޒީރު ވިދާޅުވީ ދުނިޔޭގެ އެހެން ޤައުމުތަކަށް ބައެއް ކަހަލަ ޓެކްސް ދެއްކުމުގައި މައްސަލަތަކެއް ދިމާވަމުން އެބަދާކަމަށާއި، އެކަން ހައްލުކުރުމަށް މީރާއާއި ގުޅިގެން މަސައްކަތް ކުރައްވަމުންްގެންދަވާ ކަމަށްވެސް ވަޒީރު ވަނީ ވިދާޅުވެފައެވެ.
