ރާއްޖޭގެ ހުރިހާ ސަރަހައްދެއްގައި ފެނާއި ކަރަންޓުގެ ޚިދުމަތް އެއް އަގެއްގައި ފޯރުކޮށްދޭން ސަރުކާރުން ނިންމައިފިއެވެ.
އެންވަޔަރަމަންޓް މިނިސްޓަރު ތޯރިގް އިބްރާހިމް މިއަދު ނޫސްވެރިންނާއި ބައްދަލު ކުރައްވާ ވިދާޅުވީ، މާލެ ސަރަހައްދާއި އަތޮޅުތެރޭގައި ކަރަންޓާއި ފެނުގެ އަގު އެއްވަރު ކުރުމަށް ނިންމާފައިވާ ކަމަށާއި މިއީ ރައީސުލްޖުމްހޫރިއްޔާގެ އިސްނެންގެވުމެއްގެ މަތިން ގެނެވުނު ބަދަލެއް ކަމަށެވެ.
އެގޮތުން، ކަރަންޓުގެ އަގު ސުން ޔުނިޓާ 400 ޔުނިޓާ ދެމެދަށް މިހާރު ނަގާ 2.20 ރުފިޔާގެ ބަދަލުގައި ދެން ނަގާނީ 1.50 ރުފިޔާ ކަމަށް މިނިސްޓަރު ވިދާޅުވިއެވެ. އަދި 101 ޔުނިޓާ 300 ޔުނިޓާ ދޭތެރޭގެ އަގު، 2.75 ރުފިޔާއިން 1.70 ރުފިޔާއަށް ކުޑަކޮށްފައިވާ އިރު، 201 ޔުނިޓުން 300 ޔުނިޓާ ދޭތެރޭގެ އަގު 3.40 ރުފިޔާއިން 2.15 ރުފިޔާއަށް ކުޑަކޮށްފައިވެއެވެ. މީގެ އިތުރުން 301 ޔުނިޓާއި 400 ޔުނިޓާ ދެމެދުގެ އަގު 3.50 ރުފިޔާއިން 2.50 ރުފިޔާއަށް ވަނީ ކުޑަކޮށްފައެވެ.
މިނިސްޓަރު ވިދާޅުވީ، މި ބަދަލު ތަންފީޒު ކުރެވޭނީ އަންނަ މާޗު މަހުން ފެށިގެން ކަމަށާއި. މާޗު މަހުގެ ބިލާ އެކު އަތޮޅުތެރޭގެ 85 ޕަސަންޓު ރައްޔިތުންނަށް ކަރަންޓުގެ އަގު ހެޔޮވެގެން ދާނެ ކަމަށެވެ.
ކޮންމެ ފެން ޔުނިޓަކަށް ނަގާ އަގު ހެޔޮ ކުރުމާއެކު، ކުރިން 65 ރުފިޔާއަށް ލިބެމުންދިޔަ 0 އިން 100 ލީޓަރުގެ ފެން ލިބޭނީ 22 ރުފިޔާއަށްކަމަށް މިނިސްޓަރު ވިދާޅުވެއެވެ. 75 ރުފިޔާއަށް ލިބެމުންދިޔަ 101 އިން 200 ލީޓަރުގެ ފެން މިހާރު ލިބޭނީ 70 ރުފިޔާއަށެވެ. އަދި 200 ލީޓަރުން މަތި މީގެ ކުރިން 100 ރުފިޔާއަށް ލިބުނު ނަމަވެސް މިހާރު 95 ބަދަލުކޮށްފައިވާ ކަމަށް މިނިސްޓަރު ވިދާޅުވެއެވެ.
މާލެއާ އެއް އަގެއްގައި އަތޮޅުތެރޭގައި އަސާސީ ހިދުމަތްތައް ނުލިބޭތީ ގިނަ ބަޔަކު ޝަކުވާކުރާކަން ފާހަގަކޮށް، މިނިސްޓަރު ވިދާޅުވީ، މީގެ ކުރިން އެއްވެސް ސަރުކާރަކުން މާލޭއާ އެއްއަގަކަށް ފެނުގެ ހިދުމަތް ފޯރުކޮށްދީފައި ނުވާ ކަމަށާއި މިއީ ރައީސް ޔާމީނުގެ ވިސްނުންތެރިކަމާއި އަސާސީ ހިދުމަތްތަކުގެ މުހިއްމުކަން ދެކިގެން ގެނެސްފައިވާ ބަދަލެއް ކަމަށެވެ.
