އުމުރުން 12 ވަރަކަށް އަހަރުގެ ކުދިންނަށް ދިވެހިން ވާހަކަދައްކަން ނޭނގޭ ކަމަށާއި ދިވެހިބަސް އޮތީ ކުއްލި އެހީތެރިކަން ބޭނުންވާ ހާލަތުގައި ކަމަށް ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަސީރު އިބްރާހީމް މިއަދު ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި ޚާއްސަ ބަސްދީގަތުމެއްގައި ވަޒީރު ވިދާޅުވީ އެ މަސައްކަތް ކުރުމަށް ކުރަން ޖެހޭ އެންމެ މުހިންމު ކަމަކީ، ބަހަކީ ގައުމެއް ދެމިއޮތުމަށް ހުރިހާ ދަރަޖައެއްގައި މުހިންމު އެއްޗެއްކަން ބޮޑެތި މީހުންނަށް ވިސްނައިދިނުން ކަމަށެވެ.
“ކުޑަކުދިންނަށް ބަހުގެ މުހިންމުކަން ދަސްކޮށްދީ، ހޭލުންތެރިކުރެވޭނީ އޭރުން .ދިވެހިބަހާއި ސަގާފަތާއި ތަރިކައާބެހޭ ވުޒާރާއިން މަސައްކަތް ކުރަނީ ވެސް އެ ހޭލުންތެރިކަން ކުޑަކުދިންނާ ބޮޑެތި މީހުންގެ މެދުގައި އާލާކުރުމަށް ” ވަޒީރު ވިދާޅުވިއެވެ.
ގުދުރަތީ މައްސަލަތައް ހައްލުކުރުމަށް އެންމެ ގުދުރަތީ ހަތިޔާރަކީ ބަސްކަން ދިރާސާތަކުން ދައްކާފައިވާ ކަމަށް ވަޒީރު ވިދާޅުވިއެވެ.
” އިލްމީ ގޮތުން ބަހާ ގުޅުވައި ލިބެންހުރި މައުލޫމާތުތަކުގެ ގަބޫލުކުރުންތައް ބޮޑެތި މީހުންނަށް އަވަހަށް ލިބުން މުހިންމު. އެ ކަމަށް މިހާރަށް ވުރެ ބޮޑަށް މަސައްކަތްތަކެއް ކުރެވެން ޖެހޭ” އާދަމް ނަސީރު ވަޒީރުގެ ވާހަކަފުޅުގައި ވިދާޅުވިއެވެ.
މި ޕްރޮގްރާމުގައި އިތުރަށް ވާހަކަ ދައްކަވަމުން ވަޒީރު ވިދާޅުވީ އަމާޒަކީ މި 5 އަހަރުތެރޭ، ދުނިޔޭގެ އެހެން ޤައުމުތަކުގައިވެސް އޮންނަ ގޮތަށް ދިވެހީންގެ ތަރިކައިގެ ދާއިރާއެއް އުފެދިގެން ދިއުންކަމަށާއި އެކަން ހާސިލްކުރުމަށް ވުޒާރާގެ ފަރާތުން ގިނަ މަސައްކަތްތަކެއް ކުރައްވަމުން ގެންދަވާކަމަށެވެ.
ދިވެހީންނަށް ލިބިފައިވާ ތަރިކައިގެ އެންމެ މުހިންމު އެކައްޗަކީ ދިވެހި ބަސްކަން ހަނދާންކޮށްދެއްވާ ވަޒީރު އާދަމް ނަޞީރު ވިދާޅުވީ، އެނޫންވެސް ގިނަ ތަރިކަތަކެއް ދިވެހީންނަށް ލިބިފައިވާކަމަށެވެ. އެހެންކަމުން ކޮންމެ ރަށެއްގައި ފެންވަރުގައިވެސް މިކަމާ ވަކާލަތުކުރާނެ، މިކަމަށް ކަންބޮޑުވާނެ ނުވަތަ މިކަމަށް ހޭލުންތެރި، ތަރިކަތައް ހެޔޮގޮތުގައި ދަމަހައްޓަން ބޭނުންވާ ޖަމާޢަތެއް އޮތުން ވަރަށް މުހިންމު ކަމަށް ވަޒީރުވަނީ ވިދާޅުވެފައެވެ.
