“މިއަދާ ހަމައަށް ތަކުރާރުކޮށް މުއާމަލާތްކުރަން މަސައްކަތް ކުރަމުން ގެންދިޔަ ނަމަވެސް އަނިޔާ ލިބުނު އަންހެން މީހާގެ އާއިލާގެ ފަރާތުން ފުލުހުންގެ ތަހުގީގަށް އެއްބާރުލުން ލިބިފައި ނުވާކަން ފާހަގަކުރަން. އަދި އަނިޔާ ލިބުނު އަންހެން މީހާގެ ސިއްހީ ހާލަތާ ގުޅޭގޮތުން ވެސް ފުލުހުންނާ އެއްވެސް މައުލޫމާތެއް މިހާތަނަށް ހިއްސާކޮށްފައި ނުވާއިރު، މެލޭޝިއާގައި ފަރުދާ ދެމުން ދިޔަ ހޮސްޕިޓަލް ބަދަލުކުރި އިރުވެސް ފުލުހުންނާ އެ މައުލޫމާތު ހިއްސާކޮށްފައެއް ނުވޭ.” ފުލުހުން ވިދާޅުވެފައިވެއެވެ.

ޔުމްނު ވެއްޓުނު މައްސަލައިގައި އެކަން ހިނގާދިޔަ ގޮތް ހޯދުމަށް ފުލުހުން ގިނަ މަސައްކަތްތަކެއް ކުރަމުންދާއިރު، އާއިލާއިން ގެންދަނީ ފުލުހުން ތަހުގީގު ހިންގަނީ ރަނގަޅަށް ނޫން ކަމަށް ބުނެ އިންސާފު ހޯދައިދޭން ނޫޅޭކަމަށް ތުހުމަތުކޮށްފައެވެ.

ޔުމްނު ވެއްޓުނީ މިދިޔަ މަހުގެ 18 ވަނަ ދުވަހުގެ ރޭ ހ. ފެންޓެނޯއީ ގެއިން ހ. މިޓާޒްގޭގެ ފުރާޅު މައްޗަށެވެ. އެ ހާދިސާއާއި ގުޅިގެން އެންމެ ފުރަތަމަ އޭނާއަށް ފަރުވާ ދިނީ އައިޖީއެމްއެޗްގައި ވެންޓިލޭޓަރުގައެވެ. އޭގެ ފަހުން އޭނާ އިތުރު ފަރުވާއަށް މެލޭޝިއާއަށް ފޮނުވާފައިވާއިރު، މެލޭޝިއާއަށް ފޮނުވުމަށް ސަރުކާރުން ވެސް ވަނީ އެހީތެރިކަން ފޯރުކޮށްދީފައެވެ.

ޔުމްނު ވެއްޓުނު އިރު އޭނާ އާ އެކު ހ. ފެންޓެނޯއީ ގޭގައި ހުރި ރައުދު އަހުމަދު ޒިލާލު ހައްޔަރު ކުރުމަށް ފަހު އިއްޔެ ހެނދުނު ދޫކުރުމަށްފަހު އަލުން ވަނީ ހައްޔަރުކޮށްފައެވެ.

.