މާލެ ސިޓީ ކައުންސިލުން މާފަންނު ސަހަރާ ކޮނެފައިވަނީ ޒިންމާދާރުކަން ކުޑަކޮށްކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
މިއަދު އެކްސްގައި ކުރެއްވި ޕޯސްޓެއްގައި މުއްތަލިބު ވިދާޅުވީ މާފަންނު ސަހަރާ ކޮނުމުގެ މަސައްކަތް ކުރިއިރު މާލޭ ހުޅަނގު އުތުރު ސަރަހައްދުތަކުން ފެން ހިންދަން ބޭނުންކުރާ ސްޓޯމް ވޯޓާ ޕަމްޕުގެ ބައެއް ސިޓީ ކައުންސިލުން ނަގާފައިވާ ކަމަށެވެ. އަދި މި ކަން މިނިސްޓްރީއަށް އަންގާފައި ނުވާކަމަށް މުއްތަލިބު ވަނީ ވިދާޅުވެފައެވެ.
https://x.com/muththo/status/1877984450740629870
މީގެ އިތުރުން މުއްތަލިބު ވިދާޅުވީ މިކަމުގެ ސަބަބުން އެ ސަރަހައްދުގައި ބޮޑަށް ފެންބޮޑުވާ ކަމަށާއި، މައްސަލަ ހައްލުކޮށް ސްޓޯމް ވޯޓާ ޕަމްޕުތައް ބޭނުންކުރެވޭ ގޮތް ހެދުމުގެ މަސައްކަތް ކުރަމުންދާކަމަށެވެ.
ރޭ މާލެ އަށް ކުރި ވިއްސާރައިގައިވެސް މާލޭގައި ފެނބޮޑުވެފައިވާއިރު، ސަރުކާރުން އަންނަނީ ފެންބޮޑު ވާ ސަރަހައްދުތަކަށް ދާއިމީ ހައްލެއް ހޯދުމަށް މަސައްކަތް ކުރަމުންނެވެ.
